അഫ്ഗാനിസ്ഥാനെതിരായ ഏക ടെസ്റ്റ് മത്സരത്തിനായി ന്യൂസിലൻഡ് ടീമിനൊപ്പം കെയ്ൻ വില്യംസൺ ഇന്ത്യയിലെത്തിയിരിക്കുകയാണ് . ഏറെക്കാലമായി തകർപ്പൻ ഫോമിലുള്ള ജോ റൂട്ടിനെ കിവീസ് സൂപ്പർ താരം അഭിനന്ദിക്കുകയും ചെയ്തു. വെസ്റ്റ് ഇൻഡീസിനും ശ്രീലങ്കയ്‌ക്കുമെതിരായ ഹോം ടെസ്റ്റ് മത്സരങ്ങളിലെ പ്രകടനത്തിൻ്റെ പേരിൽ റൂട്ട് ശ്രദ്ധ നേടിയിട്ടുണ്ട്.
വിൻഡീസിനും ശ്രീലങ്കക്കും എതിരായ അഞ്ച് മത്സരങ്ങളിൽ മൂന്ന് സെഞ്ച്വറികളും അർധസെഞ്ച്വറികളും 33-കാരൻ നേടിയിരുന്നു. 50.77 ശരാശരിയിൽ 12,390 റൺസാണ് ജോ റൂട്ട് നേടിയത്. “അവൻ (ജോ റൂട്ട്) വളരെക്കാലമായി വേറെ ലെവലാണ്. ഭാവിയിൽ അവൻ എന്ത് നേടിയേക്കാം എന്നതിനെക്കുറിച്ച് ധാരാളം ചർച്ചകൾ നടക്കുന്നു, അവൻ്റെ കൺവെർഷൻ റേറ്റ് കാണുന്നത് അവിശ്വസനീയമാണ്. അവൻ അസാധാരണനായിരുന്നു, ”കെയ്ൻ വില്യംസൺ ഗ്രേറ്റർ നോയിഡയിൽ മാധ്യമപ്രവർത്തകരോട് പറഞ്ഞു.
ഫാബ് 4 ലെ മറ്റ് രണ്ട് അംഗങ്ങളെ (വിരാട് കോഹ്‌ലിയും സ്റ്റീവ് സ്മിത്തും) കെയ്ൻ അഭിനന്ദിച്ചു. “ഞാൻ ജോ റൂട്ടിൻ്റെ വലിയ ആരാധകനാണ്, എന്നാൽ മറ്റ് ആളുകളും നന്നായി ചെയ്തിട്ടുണ്ട്. അവർ കളിയെ വലിയ രീതിയിൽ മുന്നോട്ട് കൊണ്ടുപോയി,” അദ്ദേഹം കൂട്ടിച്ചേർത്തു.
54.98 ശരാശരിയിൽ 8,743 ടെസ്റ്റ് റൺസ് വില്യംസൺ നേടിയിട്ടുണ്ട്, 100 മത്സരങ്ങളിൽ നിന്ന് 32 സെഞ്ചുറിയും നേടി.