രാജസ്ഥാന്‍ റോയല്‍സിന്റെ ഭാഗമാവുന്നതിനു മുമ്പ് വരെ സഞ്ജു സാംസണിനെ അറിയില്ലായിരുന്നുവെന്ന് കിവീസ് പേസര്‍ ട്രെന്റ് ബോള്‍ട്ട്. രാജസ്ഥാന്‍ റോയല്‍സിലെ ഏറ്റവുമടുത്ത സുഹൃത്ത് ആരെന്ന ചോദ്യത്തിനു മറുപടിയായിട്ടാണ് സഞ്ജുവിന്റ പേര് ബോള്‍ട്ട് പരാമര്‍ശിച്ചത്.
ഇവിടെയെത്തും മുമ്പ് എനിക്കു സഞ്ജുവിനെ അത്ര നന്നായി അറിയില്ലായിരുന്നു. അതിശയിപ്പിക്കുന്ന വ്യക്തിത്വമാണ് അദ്ദേഹത്തിന്റേത്. വളരെ ശാന്തപ്രകൃതമാണ് സഞ്ജുവിനുള്ളത്. കൂടാതെ അസാധാരണ പ്ലെയറും മികച്ച ലീഡറും കൂടിയാണ്. ഞങ്ങള്‍ക്കിടയില്‍ വളരെ നല്ല സൗഹൃദമാണുള്ളത്.
റോയല്‍സ് ടീമിലെ മറ്റൊരു അടുത്ത സുഹൃത്ത് യുസിയാണ് (യുസ്വേന്ദ്ര ചഹല്‍). എല്ലാവരും അവനുമായി നല്ല അടുപ്പമുണ്ടായിരിക്കും. നല്ല മൂല്യമുള്ള അതോടൊപ്പം എനര്‍ജിയുമുള്ള വ്യക്തി കൂടിയാണ് യുസി- ബോള്‍ട്ട് പറഞ്ഞു.
Read more
2021ലെ സീസണിനു ശേഷം മുംബൈ ഇന്ത്യന്‍സ് കൈവിട്ടതിനെ തുടര്‍ന്നാണ് ബോള്‍ട്ട് റോയല്‍സിലേക്ക് എത്തിയത്. കഴിഞ്ഞ സീസണില്‍ ടീമിനെ ഫൈനലിലെത്തിക്കുന്നതില്‍ നിര്‍ണായക പങ്കുവഹിച്ച താരങ്ങളിലൊരാളായിരുന്നു ബോള്‍ട്ട്. 7.92 ഇക്കോണമി റേറ്റില്‍ 16 വിക്കറ്റുകളാണ് അദ്ദേഹം വീഴ്ത്തിയത്. ഈ സീസണിലും ബോള്‍ട്ട് മികച്ച ഫോമിലാണ്. ആറു കളിയില്‍ നിന്നും ഒമ്പതു വിക്കറ്റുകള്‍ പേസര്‍ നേടിയിട്ടുണ്ട്.
