ഇന്ത്യന്‍ ക്രിക്കറ്റിന്റെ ചുമതല തന്നെ ഏല്‍പ്പിക്കുകയാണെങ്കില്‍ എന്താണ് ചെയ്യുകയെന്നു തുറന്നു പറഞ്ഞ് ഇംഗ്ലണ്ടിന്റെ മുന്‍ നായകന്‍ മൈക്കല്‍ വോണ്‍. ടി20 ലോകകപ്പിലെ ഇന്ത്യയുടെ സെമിയിലെ പരാജയത്തിന്റെയും ഇംഗ്ലണ്ടിന്റെ കിരീട ധാരണത്തിന്റെയും പശ്ചാത്തലത്തിലാണ് വോണിന്റെ പ്രതികരണം.
ഇന്ത്യന്‍ ക്രിക്കറ്റ് നടത്തിപ്പിന്റെ ചുമതല എനിക്കാണ് കിട്ടുന്നതെങ്കില്‍ ഞാന്‍ എന്റെ അഭിമാനമെല്ലാം വേണ്ടെന്നു വച്ച് പ്രചോദനത്തിനു വേണ്ടി ഇംഗ്ലണ്ടിനെയായിരിക്കും നോക്കുക. ഇംഗ്ലണ്ട് വൈറ്റ് ബോള്‍ കളിക്കാരുടെ ഈ ഗ്രൂപ്പ് അസാധാരണം തന്നെയാണ്. ലോകത്തിനു മുഴുവനും അനുകരിക്കേണ്ട ഒരു ട്രെന്‍ഡ് സെറ്റിംഗ് ടീം ഇംഗ്ലണ്ടിനു ഉണ്ടായിരിക്കുകയാണ്.
ഇംഗ്ലണ്ട് എങ്ങനെയാണ് ഇതു സാധിച്ചെടുത്തത്? ഏറ്റവും ആവശ്യമുള്ളപ്പോള്‍ കളി ജയിക്കേണ്ടത് എങ്ങനെയാണെന്നു ഇംഗ്ലണ്ടിനു അറിയാം. ഇത്തരമൊരു മാനസികാവസ്ഥയാണ് അവരുടേത്. വലിയ ഗെയിമുകള്‍ ജയിപ്പിക്കാന്‍ സാധിക്കുന്ന കളിക്കാരും ഇംഗ്ലണ്ടിനുണ്ടെന്നും വോണ്‍ പറഞ്ഞു.
2011ലെ ഏകദിന ലോകകപ്പില്‍ ജേതാക്കളായ ശേഷം ഇന്ത്യ എന്താണ് ചെയ്തിട്ടുള്ളത്. ഒന്നും തന്നെയില്ല. വര്‍ഷങ്ങളുടെ പഴക്കമുള്ള വൈറ്റ് ബോള്‍ ക്രിക്കറ്റാണ് ഇന്ത്യ ഇപ്പോഴും കളിച്ചു കൊണ്ടിരിക്കുന്നതെന്ന് അടുത്തിടെ വോണ്‍ വിമര്‍ശിച്ചിരുന്നു. ഇതിന് പിന്നാലെയാണ് വോണിന്റെ പുതിയ പ്രതികരണം.
