സിഡ്‌നി ക്രിക്കറ്റ് ഗ്രൗണ്ടിൽ ഓസ്‌ട്രേലിയയ്‌ക്കെതിരായ അഞ്ചാമത്തെയും അവസാനത്തെയും ടെസ്റ്റിൽ ഇന്ത്യ വിരാട് കോഹ്‌ലിയെ അഞ്ചാം നമ്പറിലേക്ക് മാറ്റി പകരം ഫോമിലുള്ള നിതീഷ് റെഡ്ഡിയെ ഉൾപ്പെടുത്തണമെന്ന് മുൻ പാകിസ്ഥാൻ താരം ബാസിത് അലി കരുതുന്നു. കോഹ്‌ലി തൻ്റെ പിഴവുകളിൽ നിന്ന് പഠിക്കുന്നില്ലെന്നും എല്ലാ മത്സരങ്ങളിലും സമാനമായ രീതിയിൽ പുറത്താകുകയാണെന്നും അലി പരാമർശിച്ചു. ഓഫ് സ്റ്റമ്പിന് പുറത്തുപോകുന്ന പന്തിൽ ബാറ്റുവെച്ചാണ് കോഹ്‌ലി ഈ പരമ്പരയിൽ 7 തവണയും വിക്കറ്റ് കളഞ്ഞത്.
മെൽബണിൽ നടന്ന നാലാം ടെസ്റ്റിൽ ഓസ്‌ട്രേലിയയ്‌ക്കെതിരെ ഇന്ത്യ 184 റൺസിൻ്റെ തോൽവി ഏറ്റുവാങ്ങി. 340 റൺസ് പിന്തുടർന്ന സന്ദർശകർക്ക് 79.1 ഓവറിൽ 155 റൺസെടുക്കാനേ കഴിഞ്ഞുള്ളൂ. യശസ്വി ജയ്‌സ്വാൾ 84 റൺസ് നേടിയെങ്കിലും കോഹ്‌ലിയും ക്യാപ്റ്റൻ രോഹിത് ശർമ്മയും വീണ്ടും നിരാശപ്പെടുത്തി.
കോഹ്‌ലി സ്ഥിരമായി സമാന രീതിയിൽ പുറത്തായിട്ടും പാഠങ്ങൾ പഠിക്കാത്തതിൽ ആരാധകരും അസ്വസ്ഥരാണ്. “നിതീഷ് കുമാർ റെഡ്ഡിയെ ബാറ്റിംഗ് സ്ലോട്ടിൽ നാലാം സ്ഥാനത്തേക്ക് ഉയർത്താനും വിരാട് കോഹ്‌ലി റൺസ് നേടാത്തതിനാൽ അഞ്ചാം നമ്പറിലേക്ക് ഇറക്കാനുമുള്ള സമയമാണിത്. സമാനമായ രീതിയിലാണ് അദ്ദേഹം പുറത്താകുന്നത്.” ബാസിത് അലി പറഞ്ഞു.
“നിങ്ങൾക്ക് സംഭാവന ചെയ്യാൻ കഴിയുന്നില്ലെങ്കിൽ, ലോവർ ഓർഡറിലേക്ക് മാറുക. രോഹിത് ശർമ്മ അത് ചെയ്തു, പക്ഷേ ആരും വിരാട് കോഹ്‌ലിയെക്കുറിച്ച് ചിന്തിക്കുന്നില്ല, കാരണം എല്ലാവരും അവനെ ഭയപ്പെടുന്നു, ”അദ്ദേഹം പറഞ്ഞു.
മെൽബണിൽ നടന്ന ബോക്‌സിംഗ് ഡേ ടെസ്റ്റിൻ്റെ ആദ്യ ഇന്നിംഗ്‌സിലാണ് റെഡ്ഡി തൻ്റെ കന്നി ടെസ്റ്റ് സെഞ്ച്വറി നേടിയത്. ഏഴ് ഇന്നിംഗ്‌സുകളിൽ നിന്ന് 49 ശരാശരിയിൽ 294 റൺസാണ് അദ്ദേഹം നേടിയത്. ഏഴ് ഇന്നിംഗ്‌സുകളിൽ നിന്ന് 167 റൺസാണ് കോഹ്‌ലിയുടെ സമ്പാദ്യം.