ഐസിസി ലോകകപ്പ് 2023 ഫൈനലില്‍ ഓസ്‌ട്രേലിയയോട് തോറ്റതിന്റെ നിരാശയ്ക്ക് ശേഷം, ദക്ഷിണാഫ്രിക്കയിലെ തങ്ങളുടെ കന്നി ടെസ്റ്റ് പരമ്പര വിജയത്തിലേക്ക് ഉറ്റുനോക്കുകയാണ് ടീം ഇന്ത്യ. പ്രോട്ടീസിനെതിരെ ഏകദിന, ടി20, ടെസ്റ്റു് പരമ്പരകളാണ് ഇന്ത്യ കളിക്കുന്നത്. ദക്ഷിണാഫ്രിക്കയില്‍ ആദ്യമായി ടെസ്റ്റ് പരമ്പര നേടാനുള്ള ഏറ്റവും മികച്ച അവസരമാണ് ഇന്ത്യയ്ക്ക് മുന്നിലുള്ളത്. എന്നാല്‍ ഇന്ത്യയ്ക്ക് ആ ലക്ഷ്യം എത്തിപ്പിടിക്കണമെങ്കില്‍ വിരാട് കോഹ് ലി വിചാരിക്കണമെന്ന വിലയിരുത്തല്‍ നടത്തിയിരിക്കുകയാണ് ഇതിഹാസ ഓള്‍റൗണ്ടര്‍ ജാക്ക് കാലിസ്.
ദക്ഷിണാഫ്രിക്കയിലേത് ബാറ്ററെന്ന നിലയില്‍ വലിയൊരു പരമ്പരയായി മാറ്റാന്‍ വിരാട് കോഹ്‌ലി ആഗ്രഹിക്കുമെന്ന കാര്യം എനിക്കുറപ്പാണ്. അദ്ദേഹം ഇപ്പോള്‍ മികച്ച ഫോമിലുമാണ്. ടെസ്റ്റ് പരമ്പരയില്‍ ഇന്ത്യയെ സഹായിക്കുന്നതില്‍ വിരാട് പ്രധാന റോള്‍ വഹിക്കുമെന്നു ഞാന്‍ കരുതുന്നു. ഇന്ത്യക്കു ഇവിടെ ടെസ്റ്റ് പരമ്പര ജയിക്കണമെങ്കില്‍ അദ്ദേഹത്തിനു ഇതു നല്ലൊരു പരമ്പര ആയിരിക്കേണ്ടതുണ്ട്.
വിരാട് കോഹ്‌ലി വലിയ പ്ലെയറാണ്. എവിടെ കളിച്ചാലും അക്കാര്യത്തില്‍ വ്യത്യാസവുമില്ല. ദക്ഷിണാഫ്രിക്കയില്‍ കുറച്ചു മല്‍സരങ്ങളില്‍ കളിച്ചിട്ടുള്ള അദ്ദേഹം നന്നായി പെര്‍ഫോം ചെയ്തിട്ടുമുണ്ട്. ഇവിടെ നേരത്തേ കളിച്ചതിന്റെ അനുഭവത്തിലൂടെ ലഭിച്ച അറിവ് വിരാട് ടീമിലെ മറ്റു താരങ്ങളുമായി പങ്കുവയ്ക്കും.
പ്രത്യേകിച്ചും യുവതാരങ്ങള്‍ക്കു ഇതു ഏറെ സഹായം ചെയ്യും. ഇവിടുത്തെ സാഹചര്യങ്ങളെ എങ്ങനെ നന്നായി കൈകാര്യം ചെയ്യാമെന്നതിനെക്കുറിച്ച് അവര്‍ക്കു വിരാട് ഐഡിയകളും ഉപദേശിക്കും. കൂടാതെ ഇവിടുത്തെ പിച്ചുകളില്‍ നിന്നും എന്തൊക്കെ പ്രതീക്ഷിക്കാമെന്നതിനെക്കുറിച്ചും അദ്ദേഹം അവരെ ബോധ്യപ്പെടുത്തും- കാലിസ് നിരീക്ഷിച്ചു.