ദക്ഷിണാഫ്രിക്കയ്ക്കെതിരായ ടി20 പരമ്പരയില്‍നിന്ന് സ്റ്റാര്‍ പേസര്‍ മുഹമ്മദ് ഷമിയും ഓള്‍റൗണ്ടര്‍ ദീപക് ഹൂഡയും പുറത്ത്. കോവിഡ് ബാധയെ തുടര്‍ന്നാണ് ഷമി വിട്ടുനില്‍ക്കുന്നത്. പുറംഭാഗത്തിനേറ്റ പരിക്കു കാരണമാണ് ദീപക് ഹൂഡയ്ക്കു പരമ്പരയില്‍ നിന്നും പിന്‍മാറേണ്ടി വന്നത്.
ഹൂഡയ്ക്കു പകരം മധ്യനിര ബാറ്റര്‍ ശ്രേയസ് അയ്യര്‍ക്ക് ടീമിലേക്ക് വിളിയെത്തി. ഓസ്ട്രേലിയക്കെതിരായ പരമ്പരയില്‍ ടീമിലേക്കു വന്ന ഉമേഷ് യാദവ് ഷമിക്കു പകരക്കാരനായി ടീമില്‍ തുടരും.
രോഹിത് ശര്‍മയ്ക്കു കീഴില്‍ ഇന്ത്യന്‍ സംഘം ആദ്യ ടി20ക്കായി മല്‍സരവേദിയായ തിരുവനന്തപുരത്ത് എത്തിക്കഴിഞ്ഞു. ബുധനാഴ്ച രാത്രി ഏഴു മണിക്ക് കാര്യവട്ടത്തെ ഗ്രീന്‍ഫീല്‍ഡ് സ്റ്റേഡിയത്തിലാണ് ആദ്യ മത്സരം.
അടുത്ത മാസത്തെ ഐസിസിയുടെ ടി20 ലോകകപ്പിനു മുന്നോടിയായി ഇന്ത്യ കളിക്കുന്ന അവസാനത്തെ പരമ്പര കൂടിയാണിത്. ടി20 പരമ്പരയ്ക്കു ശേഷം ദക്ഷിണാഫ്രിക്കയ്ക്കെതിരേ മൂന്ന് ഏകദിനങ്ങളിലും ഇന്ത്യ കളിക്കുന്നുണ്ട്. പക്ഷെ ടി20 ലോകകപ്പ് ടീമിലെ ആരും ഈ പരമ്പര കളിക്കുന്നില്ല.