ബംഗ്ലാദേശിനെതിരായ ടെസ്റ്റ് പരമ്പര ഇന്ത്യ കളിക്കുന്നത് വൈസ് ക്യാപ്റ്റനില്ലാതെയാണ്. കെ എല്‍ രാഹുല്‍, റിഷഭ് പന്ത്, ജസ്പ്രീത് ബുംറ തുടങ്ങി യോഗ്യരായവരെല്ലാം ടീമിലുണ്ടായിട്ടും ഇന്ത്യ വൈസ് ക്യാപ്റ്റനെ പ്രഖ്യാപിച്ചിട്ടില്ല. ഇപ്പോഴിതാ ഇതിന്റെ കാരണം വെളിപ്പെടുത്തിയിരിക്കുകയാണ് ഇന്ത്യയുടെ സഹ പരിശീലകനായ അഭിഷേക് നായര്‍.
ഇന്ത്യന്‍ ടീമില്‍ നിരവധി ഐപിഎല്‍ നായകന്മാരുണ്ടെന്ന് നമ്മള്‍ തിരിച്ചറിയണം. ശുഭ്മാന്‍ ഗില്‍, റിഷഭ് പന്ത് എന്നിവരെക്കുറിച്ച് നമ്മള്‍ പറയുന്നു. ഭാവിയില്‍ യശ്വസി ജയ്സ്വാളിനെക്കുറിച്ചും പറയാം. നിലവിലെ ഇന്ത്യന്‍ ടീമിലെ പലരും ഫ്രാഞ്ചൈസികളെ നയിക്കുന്നവരാണ്.
പ്രായം കൊണ്ട് അനുഭവസമ്പന്നരായ താരങ്ങളും ടീമിലുണ്ട്. ഇന്ത്യന്‍ ടീമിലെ എല്ലാവര്‍ക്കും തന്നെ നയിക്കാനുള്ള ഗുണമുണ്ടെന്നാണ് കരുതുന്നത്. അതുകൊണ്ടുതന്നെ പ്രത്യേകമായൊരു വൈസ് ക്യാപ്റ്റനെ നിയോഗിക്കേണ്ട ആവശ്യമില്ല- അഭിഷേക് പറഞ്ഞു.