വെസ്റ്റ് ഇന്‍ഡീസ് പര്യടനത്തിലെ ടി20 പരമ്പരയിലെ ഇന്ത്യയുടെ മോശം പ്രകടനത്തിന് പിന്നാലെ ബിസിസിഐ (ബോര്‍ഡ് ഓഫ് കണ്‍ട്രോള്‍ ഫോര്‍ ക്രിക്കറ്റ് ഇന്‍ ഇന്ത്യ) സെക്രട്ടറി ജയ് ഷാ ഇന്ത്യന്‍ ഹെഡ് കോച്ച് രാഹുല്‍ ദ്രാവിഡുമായി മിയാമിയില്‍ കൂടിക്കാഴ്ച നടത്തി. ഷാ താമസിച്ചിരുന്ന ഹോട്ടലില്‍ വെച്ചു നടന്ന കൂടിക്കാഴ്ച രണ്ട് മണിക്കൂറോളം നീണ്ടുനിന്നു.
ഇരുവരും തമ്മിലുള്ള ചര്‍ച്ചയുടെ വിശദാംശങ്ങള്‍ അജ്ഞാതമായി തുടരുമ്പോള്‍, 2023 ലോകകപ്പിലേക്കുള്ള കാര്യങ്ങളും ചര്‍ച്ച ചെയ്തതായാണ് ഊഹാപോഹങ്ങള്‍. ഒക്ടോബര്‍ 05 മുതല്‍ ഇന്ത്യയില്‍ നടക്കാനിരിക്കുന്ന ലോകകപ്പ് വിജയിക്കണമെന്ന ശക്തമായ ആഗ്രഹം ബിസിസിഐ സെക്രട്ടറി പ്രകടിപ്പിച്ചെന്നാണ് അറിയുന്നത്.
അടുത്തിടെ നടന്ന ടി20 പരമ്പരയില്‍ വെസ്റ്റ് ഇന്‍ഡീസിനെതിരായ ഇന്ത്യയുടെ 2-3 തോല്‍വിക്ക് ശേഷം, ദ്രാവിഡിന് നിരവധി വിമര്‍ശനങ്ങള്‍ നേരിടേണ്ടി വന്നിട്ടുണ്ട്. ചിലര്‍ അദ്ദേഹത്തിന്റെ നേതൃത്വത്തെ ചോദ്യം ചെയ്യുകയും മറ്റുള്ളവര്‍ ടി20 ഐകള്‍ക്ക് പുതിയ പരിശീലകനെ നിയമിക്കണമെന്ന് ആവശ്യപ്പെടുകയും ചെയ്തിരുന്നു.
അതിനിടെ, ഏഷ്യാ കപ്പിനുള്ള തയ്യാറെടുപ്പ് ക്യാമ്പ് ഓഗസ്റ്റ് 24 മുതല്‍ ഇന്ത്യന്‍ ടീം ബെംഗളൂരുവിലെ ആളൂരില്‍ ആരംഭിക്കും. എന്നിരുന്നാലും, കോണ്ടിനെന്റല്‍ കപ്പിനുള്ള ടീമിനെ എപ്പോള്‍ അന്തിമമാക്കുമെന്നതിനെക്കുറിച്ചുള്ള വിവരങ്ങള്‍ ഇതുവരെ ലഭിച്ചിട്ടില്ല.