അടുത്ത കാലത്തായി ഇന്ത്യൻ ടീമിൽ കണ്ട് വന്ന ഒരു ട്രെൻഡ് ഇങ്ങനെയാണ്. കുറച്ച് വർഷങ്ങളായി വ്യക്തിപരമായ കാരണങ്ങളാൽ വിരാട് കോഹ്‌ലി മത്സരങ്ങളിൽ നിന്ന് വിട്ടുനിന്നിരുന്നു. മകളുടെ ജന്മദിനം ആഘോഷിക്കാൻ അഫ്ഗാനിസ്ഥാനെതിരായ ടി20 മത്സരങ്ങളിലൊന്ന് അദ്ദേഹത്തിന് നഷ്ടമായി. ദക്ഷിണാഫ്രിക്കയിൽ ടെസ്റ്റ് പരമ്പര ആരംഭിക്കുന്നതിന് മുമ്പ് ഭാര്യ അനുഷ്‌ക ശർമയ്‌ക്കൊപ്പം പുതുവത്സരം ആഘോഷിക്കാൻ അദ്ദേഹം ടീം വിട്ടു. ഇംഗ്ലണ്ടിനെതിരായ അഞ്ച് ടെസ്റ്റുകളുടെ പരമ്പരയും രണ്ടാമത്തെ കുഞ്ഞിന്റെ ജനനത്തോട് അനുബന്ധിച്ച് കോഹ്‌ലി ഉപേക്ഷിച്ചിരുന്നു.
തൻ്റെ രണ്ടാമത്തെ കുഞ്ഞിൻ്റെ ജനനത്തോടനുബന്ധിച്ച് ഓസ്‌ട്രേലിയക്കെതിരായ ആദ്യ ടെസ്റ്റിൽ രോഹിത് ശർമ്മയും പങ്കെടുത്തിരുന്നില്ല. ഇപ്പോഴിതാ മുൻ ഇന്ത്യൻ ക്യാപ്റ്റൻ സുനിൽ ഗവാസ്‌കർ, ടീം ഈ പ്രവണത തുടരാൻ ആഗ്രഹിക്കുന്നില്ലെന്നും കളിക്കാരെ ആരാധിക്കുന്നത് നിർത്തി ഇന്ത്യൻ ക്രിക്കറ്റിൻ്റെ പുരോഗതിക്കായി കർശന നടപടിയെടുക്കണമെന്നും ഇന്ത്യൻ ക്രിക്കറ്റ് കൺട്രോൾ ബോർഡിനോട് (ബിസിസിഐ) അഭ്യർത്ഥിച്ചു.
ഓസ്‌ട്രേലിയയിൽ ഇന്ത്യയുടെ 1-3 ടെസ്റ്റ് പരമ്പര തോൽവിയോട് പ്രതികരിച്ച ഗവാസ്‌കർ പ്രതിജ്ഞാബദ്ധരായ കളിക്കാരെ തിരഞ്ഞെടുക്കണമെന്ന് പറഞ്ഞു. ഓസ്‌ട്രേലിയയ്‌ക്കെതിരായ ആദ്യ ടെസ്റ്റിൽ 295 റൺസിന് ഇന്ത്യ വിജയിച്ചെങ്കിലും മൂന്ന് മത്സരങ്ങൾ പരാജയപ്പെട്ട് പരമ്പര കൈവിട്ടു. “അടുത്ത 8-10 ദിവസങ്ങൾ പ്രധാനമാണെന്ന് ഞാൻ കരുതുന്നു. സ്റ്റാർ സംസ്കാരം അവസാനിപ്പിക്കേണ്ട സമയം അതിക്രമിച്ചിരിക്കുന്നു. താരങ്ങൾ നൂറുശതമാനവും ഇന്ത്യൻ ക്രിക്കറ്റിന് നൽകേണ്ടിവരും. മെഡിക്കൽ എമർജൻസി ഇല്ലെങ്കിൽ കളിക്കാർ എല്ലാ സീരീസും കളിക്കണം. കളിക്കാൻ തയ്യാറാകാത്ത കളിക്കാരെ പരിഗണിക്കേണ്ടതില്ല, ”അദ്ദേഹം ഇന്ത്യ ടുഡേയോട് പറഞ്ഞു.
ഇന്ത്യ ലോക ടെസ്റ്റ് ചാമ്പ്യൻഷിപ്പ് ഫൈനലിൽ കടക്കാത്തതിൽ ഉള്ള നിരാശയും അദ്ദേഹം പങ്കുവെച്ചു.“കളിക്കാരെ ലാളിക്കുന്നത് നിർത്തേണ്ട സമയമാണിത്. ഞങ്ങൾ ലോക ടെസ്റ്റ് ചാമ്പ്യൻഷിപ്പിൻ്റെ ഫൈനലിൽ എത്തേണ്ടതായിരുന്നു, പക്ഷേ യോഗ്യത നേടിയില്ല, ”അദ്ദേഹം കൂട്ടിച്ചേർത്തു.