ഇന്ത്യന്‍ മുന്‍ ക്രിക്കറ്റ് താരവും നടനുമായ സലില്‍ അങ്കോളയുടെ അമ്മയെ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തി. വെള്ളിയാഴ്ച പുനെയിലെ പ്രഭാത് റോഡിലെ ഫ്‌ളാറ്റില്‍ കഴുത്തറുത്ത നിലയിലാണ് മാലാ അശോക് അങ്കോളയെ(77) കണ്ടെത്തിയത്.
വീട്ടുജോലിക്കാരിയാണ് ചോരയൊലിപ്പിച്ച നിലയില്‍ മാലാ അശോകിനെ ആദ്യം കണ്ടത്. ഉടനെ തന്നെ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. സംഭവം കൊലപാതകം ആണോ ജീവനൊടുക്കിയതാണോ എന്ന് അന്വേഷിക്കുന്നതായി പൊലീസ് പറഞ്ഞു.
പ്രാഥമിക അന്വേഷണത്തില്‍ വീടിനുള്ളില്‍ പിടിവലിയോ മറ്റോ നടന്നതിന്റെയൊന്നും ലക്ഷണങ്ങളൊന്നും ഇല്ലെന്ന് പൊലീസ് വ്യക്തമാക്കി. വീട്ടില്‍ നിന്ന് ബഹളങ്ങളൊന്നും കേട്ടില്ലെന്നാണ് പ്രദേശവാസികളുടെ മൊഴി.
1989 മുതല്‍ 1997 വരെ സലീല്‍ അങ്കോള ഇന്ത്യന്‍ ടീമിന്റെ ഭാഗമായിരുന്നു. ഇതിനിടെ 1990ല്‍ സിനിമയിലേക്കും താരം അരങ്ങേറ്റം നടത്തി.