2022 ഐപിഎല്‍ സീസണില്‍ രാജസ്ഥാന്‍ റോയല്‍സിനായി ഏറ്റവും അധികം റണ്‍സ് നേടുക മലയാളി താരം സഞ്ജു സാംസണ്‍ ആയിരിക്കില്ലെന്ന് പ്രവചനം. ടീമിലെ മറ്റൊരു മലയാളി താരമായ ദേവ്ദത്ത് പടിക്കല്‍ ആയിരിക്കും റോയല്‍സിന്റെ ടോപ്‌സ്‌കോററെന്ന് ഇന്ത്യന്‍ മുന്‍ ഓപ്പണറും കമന്റേറ്ററുമായ ആകാശ് ചോപ്ര പറഞ്ഞു.
‘രാജസ്ഥാന്‍ റോയല്‍സിനായി സീസണില്‍ ഏറ്റവും അധികം റണ്‍സ് നേടുക ദേവ്ദത്തായിരിക്കും. ജോസ് ബട്ലര്‍ക്കു മധ്യ നിരയിലേക്കിറങ്ങി ബാറ്റു ചെയ്യേണ്ടിവരും. കാരണം, കരുണ്‍ നായര്‍, റിയാന്‍ പരാഗ് എന്നിവരെ ഒഴിച്ചു നിര്‍ത്തിയാല്‍ മധ്യനിരയില്‍ പരിചയ സമ്പന്നരായ മറ്റു താരങ്ങളില്ല എന്തായാലും ടീമിനായി ഏറ്റവും അധികം റണ്‍സ് നേടുന്നത് ദേവ്ദത്തായിരിക്കും’ ചോപ്ര പറഞ്ഞു.
മറ്റൊരു ടീമിനും അവകാശപ്പെടാനില്ലാത്ത ബോളിംഗ് ലൈനപ്പാണ് റോയല്‍സിന്റേതെന്നും ചോപ്ര പറഞ്ഞു. ‘മറ്റൊരു ടീമിലും രാജസ്ഥാനെക്കാള്‍ മികച്ച ബോളിംഗ് ലൈനപ്പ് കാണാനാകില്ല. യുസ്വേന്ദ്ര ചഹല്‍, രവിചന്ദ്രന്‍ അശ്വിന്‍, ട്രെന്റ് ബോള്‍ട്ട്, പ്രസിദ്ധ് കൃഷ്ണ എന്നിവര്‍ ടീമിലുണ്ട്. 16 ഓവര്‍ പ്രശ്‌നങ്ങളില്ലാതെ കടന്നുപോകും. റിയാന്‍ പരാഗ്, ജിമ്മി നീഷം എന്നിവരെക്കൊണ്ടും കുറച്ച് ഓവറുകള്‍ എറിയിക്കാം’ ചോപ്ര അഭിപ്രായപ്പെട്ടു.
കഴിഞ്ഞ സീസണില്‍ ആര്‍സിബിയ്ക്കായി മിന്നും പ്രകടനം കാഴ്ചവെച്ച ദേവ്ദത്തിനെ 7.75 കോടി രൂപയ്ക്കാണ് രാജസ്ഥാന്‍ ടീമിലെത്തിച്ചത്. ഐപിഎല്‍ കരിയറില്‍ 29 മത്സരങ്ങളില്‍ 884 റണ്‍സ് ദേവ്ദത്ത് നേടിയിട്ടുണ്ട്.