ചൊവ്വാഴ്ച ഏകാന ക്രിക്കറ്റ് സ്റ്റേഡിയത്തില്‍ മുംബൈ ഇന്ത്യന്‍സും ലഖ്നൗ സൂപ്പര്‍ ജയന്റ്സും തമ്മിലുള്ള നിര്‍ണായക മത്സരത്തിന് ഒരുങ്ങുന്ന മുംബൈ ടീമിന് തിരിച്ചടി. ടീമിന്റെ യുവ പേസര്‍ അര്‍ജുന്‍ ടെണ്ടുല്‍ക്കറെ പട്ടി കടിച്ചു. തന്നെ പട്ടി കടിച്ചതായി ലഖ്നൗ സൂപ്പര്‍ ജയന്റ്സ് ഫ്രാഞ്ചൈസി അപ്ലോഡ് ചെയ്ത വീഡിയോയില്‍ അര്‍ജുന്‍ തന്നെയാണ് വെളിപ്പെടുത്തിയത്.
സുഹൃത്തുക്കളായ യുധ്വീര്‍ സിംഗ് ചരക്, മൊഹ്സിന്‍ ഖാന്‍ എന്നിവരുമായുള്ള കുശലാന്വേഷണങ്ങള്‍ക്കിടെയാണ്, ഒരു ദിവസം മുമ്പ് തന്റെ ഇടത് കൈയില്‍ പട്ടി കടിച്ചെന്നും മുറിവുണ്ടെന്നും താരം വെളിപ്പെടുത്തിയത്. ‘മുംബൈയില്‍ നിന്നെത്തിയ കൂട്ടുകാരന്‍’ എന്ന തലക്കെട്ടോടെയാണ് വീഡിയോ ട്വിറ്ററില്‍ പങ്കുവെച്ചത്.
കാര്യമായ പരിക്കുകളൊന്നുമില്ലെന്നും മറ്റ് ആരോഗ്യ പ്രശ്നങ്ങളില്ലെന്നും അര്‍ജുന്‍ പറയുന്നത് വീഡിയോയില്‍ കാണാം. ലഖ്‌നോവിനെതിരെ അര്‍ജുന്‍ കളിക്കില്ലെന്നാണ് പുറത്തുവരുന്ന വിവരം.
ഐപിഎല്‍ പ്ലേ ഓഫ് ഉറപ്പിക്കാന്‍ ഇരു ടീമുകള്‍ക്കും ഇന്നത്തെ മത്സരം നിര്‍ണായകമാണ്. നിലവില്‍ 12 മത്സരങ്ങളില്‍നിന്ന് 14 പോയന്റുമായി മുംബൈ മൂന്നാമതും ഇത്രയും മത്സരങ്ങളില്‍നിന്ന് 13 പോയന്റുമായി ലഖ്‌നോ നാലാമതുമാണ്.