ശനിയാഴ്ച കൊല്‍ക്കത്തയിലെ ഈഡന്‍ ഗാര്‍ഡന്‍സ് സ്റ്റേഡിയത്തില്‍ നടന്ന മത്സരത്തിനിടെ കൊല്‍ക്കത്ത നൈറ്റ് റൈഡേഴ്സിന്റെവിക്കറ്റ് കീപ്പര്‍ ബാറ്റ്സ്മാന്‍ റഹ്‌മാനുള്ള ഗുര്‍ബാസുമായി കയര്‍ത്ത് ഗുജറാത്ത് ടൈറ്റന്‍സ് നായകന് ഹാര്‍ദിക് പാണ്ഡ്യ. 21 കാരനായ അഫ്ഗാനി ക്രിക്കറ്റ് താരം ഗുര്‍ബാസ് ഹാര്‍ദിക്കിനെ കൂറ്റന്‍ സിക്സറിന് പറത്തിയതിന് പിന്നാലെയായിരുന്നു ഇത്.
കെകെആറിന്റെ ഇന്നിംഗ്സിന്റെ 13-ാം ഓവറിലാണ് സംഭവം. ഹാര്‍ദ്ദിക് എറിഞ്ഞ ആദ്യ ബോളില്‍ ഗുര്‍ബാസ് സിക്‌സടിച്ചു. പിന്നാലെ ഹാര്‍ദിക് ഗുര്‍ബാസിനോട് എന്തോ പറഞ്ഞു. ശേഷം ഗുര്‍ബാസും ഹാര്‍ദ്ദിക്കിനോട് സംസാരിച്ചു. സംഭാഷണത്തിനിടയില്‍ ഗുര്‍ബാസിന്റെ മുഖത്ത് പുഞ്ചിരിയുണ്ടായിരുന്നു. എന്നാല്‍ ഹാര്‍ദ്ദിക് ദേഷ്യത്തിലായിരുന്നു.
അടുത്ത ഡെലിവറി ബൗള്‍ ചെയ്യാന്‍ റെഡിയാകുന്ന ഹാര്‍ദിക് ഗുര്‍ബാസിന്റെ വാക്കുകളില്‍ ഒട്ടും തൃപ്തനാകാതെ കോപാകുലനായ സ്വരത്തില്‍ ബാറ്ററോട് എന്തോ പറയുന്നത് വീഡിയോയിയില്‍ കാണാം. സംഭവിത്തില്‍ ഇടപെട്ട അമ്പയര്‍ ജിടി നായകന് മുന്നറിയിപ്പ് നല്‍കുന്നതും വീഡിയോയില്‍ കാണാം.
മത്സരത്തില്‍ കൊല്‍ക്കത്ത നൈറ്റ് റൈഡേഴ്‌സിനെ കീഴടക്കി ഗുജറാത്ത് ടൈറ്റന്‍സ് വീണ്ടും പോയിന്റ് പട്ടികയില്‍ ഒന്നാമതെത്തി. ഏഴു വിക്കറ്റിനാണു ഗുജറാത്തിന്റെ വിജയം. കൊല്‍ക്കത്ത ഉയര്‍ത്തിയ 180 റണ്‍സ് വിജയലക്ഷ്യം മൂന്ന് വിക്കറ്റ് മാത്രം നഷ്ടത്തില്‍ 13 പന്തുകള്‍ ബാക്കി നില്‍ക്കെ ഗുജറാത്ത് മറികടന്നു.