കഴിഞ്ഞ ദിവസം മുംബൈ ഇന്ത്യന്‍സിനെതിരായ ഏറ്റുമുട്ടലില്‍ ജിടി ക്യാപ്റ്റന് ഹാര്‍ദിക് പാണ്ഡ്യ ഒരു ഓവര്‍ പോലും എറിഞ്ഞില്ല എന്നത് കൗതുകമുണര്‍ത്തിയ കാര്യമായിരുന്നു. മുഹമ്മദ് ഷമിക്കൊപ്പം മോഹിത് ശര്‍മയാണ് സ്‌പെല്‍ തുറന്നത്. പിന്നീട്, ഗുജറാത്ത് ടൈറ്റന്‍സ് അസിസ്റ്റന്റ് കോച്ച് ആശിഷ് കപൂര്‍ ഹാര്‍ദിക് പാണ്ഡ്യയുടെ പരിക്കിനെ കുറിച്ച് വെളിപ്പെടുത്തി.
ഗെയിം ആരംഭിക്കുന്നതിന് തൊട്ടുമുമ്പ് ജിടി ക്യാപ്റ്റന് നടുവിന് ഉളുക്ക് അനുഭവപ്പെട്ടതായി ആശിഷ് കപൂര്‍ വെളിപ്പെടുത്തി. അതിനാല്‍ മുന്‍കരുതല്‍ എന്ന നിലയില്‍ ഹാര്‍ദിക്കിനോട് പന്തെറിയാന്‍ ആവശ്യപ്പെട്ടില്ലെന്നും അദ്ദേഹം പറഞ്ഞു. ബോളെറിഞ്ഞില്ലെങ്കിലും താരം ഫീല്‍ഡില്‍ സജീവമായിരുന്നു. അതിനാല്‍ പരിക്ക് സാരമുള്ളതല്ലെന്നാണ് മനസിലാക്കേണ്ടത്.
വാങ്കഡെയില്‍ മുംബൈ ഇന്ത്യന്‍സിനെതിരായ മത്സരത്തില്‍ ജിടി 5 ബോളര്‍മാരെയാണ് പരീക്ഷിച്ചത്. ന്യൂബോള്‍ ഉത്തരവാദിത്തം മുഹമ്മദ് ഷമിയെയും മോഹിത് ശര്‍മയെയും ഏല്‍പ്പിച്ചു. മധ്യ ഓവറുകളില്‍ അഫ്ഗാന്‍ സ്പിന്‍ ജോഡികളായ റാഷിദ് ഖാനും നൂര്‍ അഹമ്മദും തങ്ങളുടെ മാന്ത്രികത നെയ്തു. അല്‍സാരി ജോസഫ് ഡെത്ത് ഓവറുകള്‍ പൂര്‍ത്തിയാക്കി.
മത്സരത്തില്‍ മുംബൈ ഇന്ത്യന്‍സിനോട് ഗുജറാത്ത് 27 റണ്‍സിന്റെ തോല്‍വി ഏറ്റുവാങ്ങി. ബോളിംഗില്‍ നിന്ന് വിട്ടുനിന്ന ഹാര്‍ദിക് പാണ്ഡ്യയ്ക്ക് ബാറ്റിംഗിലും കാര്യമായ സംഭാവന നല്‍കാനായില്ല. 3 പന്തില്‍ നിന്ന് 4 റണ്‍സ് മാത്രമാണ് അദ്ദേഹം നേടിയത്.
