ഐപിഎല്‍ 17ാം സീസണില്‍ മുംബൈ ഇന്ത്യന്‍സ് താരം ഇഷാന്‍ കിഷന് മോശം തുടക്കം. ഗുജറാത്ത് ടൈറ്റന്‍സിനെതിരായ സീസണിലെ ആദ്യ മത്സരത്തില്‍ താരം അക്കൗണ്ട് തുറക്കാനാകാതെ പുറത്തായി. നാല് ബോള്‍ മാത്രമായിരുന്നു താരത്തിന്റെ ആയുസ്സ്.
നിലവില്‍ ഇന്ത്യന്‍ ടീമിനും ബിസിസിഐ കരാറിനും പുറത്തുമുള്ള താരം മോശം സമയത്തിലൂടെയാണ് കടന്നുപോകുന്നത്. ഇന്ത്യന്‍ ടീമില്‍നിന്നും വിശ്രമമമെടുത്ത താരത്തോട് ആഭ്യന്തര മത്സരങ്ങള്‍ കളിക്കാന്‍ നിര്‍ദ്ദേശിച്ചിട്ടും താരം അതിന് തയ്യാറായിരുന്നില്ല. അതിനു പകരം താരം മുംബൈ നായകന്‍ ഹാര്‍ദ്ദിക് പാണ്ഡ്യയ്‌ക്കൊപ്പം ഐപിഎല്‍ സീസണിനുള്ള പരിശീലനത്തിലായിരുന്നു.
കളിയിലേക്ക് വന്നാല്‍ ആദ്യം ബാറ്റ് ചെയ്ത ഗുജറാത്ത് ടൈറ്റന്‍സ് 169 റണ്‍സിന്റെ വിജയലക്ഷ്യമാണ് മുംബൈയ്ക്ക് മുമ്പില്‍ വെച്ചിരിക്കുന്നത്. ടോസ് നഷ്ടപ്പെട്ട് ബാറ്റിംഗിനെത്തിയ ഗുജറാത്തിന് സായ് സുദര്‍ശന്റെ (45) ഇന്നിംഗ്സാണ് തുണയായത്. നായകന്‍ ശുഭ്മാന്‍ ഗില്‍ 31 റണ്‍സെടുത്തു.
ജസ്പ്രിത് ബുംമ്ര നാല് ഓവറില്‍ 14 റണ്‍സ് മാത്രം വഴങ്ങി മൂന്ന് വിക്കറ്റെടുത്തു. മുന്‍ ഗുജറാത്ത് ക്യാപ്റ്റനും നിലവില്‍ മുംബൈ നായകനുമായ ഹാര്‍ദിക് പാണ്ഡ്യ മൂന്ന് ഓവറില്‍ 30 റണ്‍സ് വഴങ്ങി. വിക്കറ്റൊന്നുമെടുക്കാന്‍ സാധിച്ചതുമില്ല.
