ഐപിഎലില്‍ ഡല്‍ഹി ക്യാപിറ്റല്‍സിനെതിരെ കെകെആറിന് കൂറ്റന്‍ സ്‌കോര്‍. ക്രീസിലെത്തിയ കെകെആര്‍ ബാറ്റര്‍മാരെല്ലാം വെളിച്ചപ്പാടായപ്പോള്‍ 20 ഓവറില്‍ 7 വിക്കറ്റ് നഷ്ടത്തില്‍ 272 റണ്‍സ് പിറന്നു. തകര്‍പ്പന്‍ ബാറ്റിംഗ് വിരുന്നൊരുക്കി അര്‍ദ്ധ സെഞ്ച്വറി നേടിയ വിന്‍ഡീസ് താരം സുനില്‍ നരെയ്‌നാണ് കെകെആറിന്റെ ടോപ് സ്‌കോറര്‍. 39 ബോള്‍ നേരിട്ട താരം ഏഴ് വീതം സിക്‌സിന്റെയും ഫോറിന്റെയും അകമ്പടിയില്‍ 85 റണ്‍സാണ് അടിച്ചെടുത്തത്.
കെകെആറിനായി യുവതാരം അംഗൃഷ് രഘുവംശിയും ബാറ്റിംഗ് വിസ്‌ഫോടനമാണ് അഴിച്ചുവിട്ടത്. 27 ബോളില്‍ താരം മൂന്ന് സിക്‌സിന്റെയും അഞ്ച് ഫോറിന്റെയും അകടമ്പടിയില്‍ 54 റണ്‍സെടുത്തു. അവസാന ഓവറുകളില്‍ ആഞ്ഞടിച്ച് ആന്ദ്രെ റസ്സലും റിങ്കു സിംഗുമാണ് കെകെആര്‍ സ്‌കോര്‍ 250 കടത്തിയത്.
റസ്സല്‍ 19 ബോളില്‍ മൂന്ന് സിക്‌സിന്റെയും നാല് ഫോറിന്റെയും അകമ്പടിയില്‍ 41 റണ്‍സെടുത്തു. റിങ്കു സിംഗ് 8 ബോളില്‍ മൂന്ന് സിക്‌സിന്റെയും ഒരു ഫോറിന്റെയും അകമ്പടിയില്‍ 26 റണ്‍സെടുത്തു. ഫില്‍ സാള്‍ട്ട് 18, ശ്രേയസ്സ് അയ്യര്‍ 18 എന്നിങ്ങനെയാണ് മറ്റുള്ളവരുടെ പ്രകടനം.
ഡല്‍ഹിയ്ക്കായി ആന്റിച്ച് നോര്‍ജെ മൂന്നും ഇഷാന്ത് ശര്‍മ്മ രണ്ടും ഖലില്‍ അഹമ്മദ്, മിച്ചെല്‍ മാര്‍ച്ച് എന്നിവര്‍ ഓരോ വിക്കറ്റ് വീതവും വീഴ്ത്തി. സീസണില്‍ ഇതുവരെ കളിച്ച രണ്ട് മത്സരങ്ങളും ജയിച്ചാണ് കെകെആര്‍ ഡല്‍ഹിയെ നേരിടുന്നത്.