കോഹ്‌ലിയുടെ പ്രകടനം പാഴായി, ആര്‍സിബിയുടെ കോട്ടയില്‍ കയറി പണികൊടുത്ത് കെകെആര്‍

ഐപിഎല്‍ 17ാം സീസണില്‍ രണ്ടാം തോല്‍വി വഴങ്ങി ആര്‍സിബി. ഇന്ന് സ്വന്തം തട്ടകത്തില്‍ നടന്ന മത്സരത്തില്‍ കെകെആറിനോട് ഏഴ് വിക്കറ്റിന്റെ തോല്‍വിയാണ് ആര്‍സിബി വഴങ്ങിയത്. മത്സരത്തില്‍ ആര്‍സിബി മുന്നോട്ടുവെച്ച 183 റണ്‍സ് വിജയലക്ഷ്യം 16.4 ഓവറില്‍ മൂന്ന് വിക്കറ്റ് മാത്രം നഷ്ടത്തില്‍ കെകെആര്‍ മറികടന്നു.

അര്‍ദ്ധ സെഞ്ച്വറി നേടിയ വെങ്കടേഷ് അയ്യരാണ് കെകെആറിന്റെ ടോപ് സ്‌കോറര്‍. താരം 30 ബോളില്‍ 3 ഫോറിന്റെയും 4 സിക്‌സിന്റെയും അകമ്പടിയില്‍ 50 റണ്‍സെടുത്തു. സുനില്‍ നരെയ്ന്‍ 22 ബോളില്‍ 5 സിക്‌സിന്റെയും 2 ഫോറിന്റെയും അകമ്പടിയില്‍ 47 റണ്‍സെടുത്തു. ഫില്‍ സാള്‍ട്ട് 20 ബോളില്‍ 30, ശ്രേയസ് അയ്യര്‍ 24 ബോളില്‍ 39* എന്നിങ്ങനെയാണ് മറ്റുള്ളവരുടെ പ്രകടനം.

നിശ്ചിത ഓവറില്‍ 6 വിക്കറ്റ് നഷ്ടത്തിലാണ് ആര്‍സിബി 182 റണ്‍സ് നേടിയത്. നാല് വീതം സിക്സും ഫോറും ഉള്‍പ്പെടെ 59 പന്തില്‍ 83 റണ്‍സെടുത്ത് പുറത്താവാതെ നിന്ന വിരാട് കോഹ്‌ലിയാണ് ആര്‍സിബിയ്ക്ക് മികച്ച സ്‌കോര്‍ സമ്മാനിച്ചത്.

കെകെആറിനായി ഹര്‍ഷിദ് റാണ, ആന്ദ്രെ റെസ്സല്‍ എന്നിവര്‍ രണ്ട് വിക്കറ്റ് വീതം വീഴ്ത്തി. സുനില്‍ നരെയ്ന്‍ ഒരു വിക്കറ്റ് വീഴ്ത്തി. കെകെആറിന്റെ ഈ സീസണിലെ രണ്ടാം ജയവും ആര്‍സിബിയുടെ രണ്ടാം തോല്‍വിയുമാണിത്.