ഐപിഎലില്‍ സണ്‍റൈസേഴ്സ് ഹൈദരാബാദിനെതിരെ മുംബൈ ഇന്ത്യന്‍സ് തകര്‍പ്പന്‍ വിജയം നേടിയതിനു പിന്നാലെ കളിയിലെ തന്റെ ബോളിംഗ് പ്രകടനത്തെ സ്വയം പ്രശംസിച്ച് നായകന്‍ ഹാര്‍ദ്ദിക് പാണ്ഡ്യ. കളിയില്‍ തന്റെ ബോളിംഗ് നന്നായി വന്നുവെന്നു താരം പറഞ്ഞു. മത്സരത്തില്‍ നാലോവറില്‍ 31 റണ്‍സ് വിട്ടുകൊടുത്ത് താരം മൂന്നു വിക്കറ്റുകള്‍ വീഴ്ത്തിയിരുന്നു.
ഹൈദരാബാദുമായുള്ള ഈ കളിയില്‍ കാര്യങ്ങള്‍ പോയ രീതിയില്‍ ഞാന്‍ സന്തോഷവാനാണ്. ബോളിംഗില്‍ നല്ല ഏരിയയില്‍ പന്തെറിയാനാണ് ഞാന്‍ ഇഷ്ടപ്പെടുന്നത്. അത് എങ്ങനെ വരുമെന്നും ശ്രദ്ധിക്കാറുണ്ട്. ഇന്നത്തെ കളിയില്‍ എന്റെ ബോളിംഗ് വളരെ നന്നായി വന്നു.
സ്‌കൈയുടെ പ്രകടനം അവിശ്വസനീയമായിരുന്നു. അവന്‍ റണ്‍സ് നേടുന്നതിനേക്കാള്‍ കൂടുതല്‍ ബോളര്‍മാരെ സമ്മര്‍ദ്ദത്തിലാക്കിയെന്നു കാണാം. ഇതു കാരണം മറ്റു ബാറ്റര്‍മാര്‍ക്കു ലൂസ് ബോളുകള്‍ ലഭിക്കുകയും ചെയ്തു. ബാറ്റ് കൊണ്ട് സൂര്യ നിങ്ങളെ തകര്‍ക്കും, അവന്‍ ഏറെ മാറിക്കഴിഞ്ഞു. എന്റെ ടീമില്‍ സൂര്യയുള്ളത് ഭാഗ്യം തന്നെയാണ്. ഇതുപോലെയുള്ള നിരവധി ഇന്നിംഗ്സുകള്‍ ഇനിയും പ്രതീക്ഷിക്കുന്നു- ഹാര്‍ദ്ദിക് പറഞ്ഞു.
ഇന്നലെ സണ്‍റൈസേഴ്‌സിനെതിരെ നടന്ന മത്സരത്തില്‍ സൂര്യകുമാറിന്റെ സെഞ്ച്വറി കരുത്തില്‍ മുംബൈ ഏഴ് വിക്കറ്റിന് ജയിച്ചുകയറി. 51 പന്തില്‍ 12 ഫോറും 4 സിക്‌സും സഹിതം സൂര്യ 102 റണ്‍സ് നേടി പുറത്താകാതെ നിന്നു. 174 റണ്‍സ് പിന്തുടര്‍ന്ന മുംബൈ 17.2 ഓവറില്‍ സൂര്യകുമാറിന്റെ ഒരു കൂറ്റന്‍ സിക്‌സിലൂടെ കളി പൂര്‍ത്തിയാക്കി. സൂര്യ തന്നെയാണ് കളിയിലെ താരവും.
Read more
