ടി20 ലോകകപ്പിന് മുന്നോടിയായി തങ്ങളുടെ ദേശീയ ടീമില്‍ ചേരാന്‍ ഇംഗ്ലണ്ട് ക്രിക്കറ്റ് താരങ്ങള്‍ അവരവരുടെ ഐപിഎല്‍ ഫ്രാഞ്ചൈസികള്‍ വിട്ടു. രാജസ്ഥാന്‍ റോയല്‍സിന്റെ ഷുവര്‍-ഷോട്ട് സ്റ്റാര്‍ട്ടര്‍ ജോസ് ബട്ട്ലര്‍ ഇന്ത്യ വിട്ട താരങ്ങളില്‍ പ്രമുഖനാണ്. ഈ വിടവ് നികത്താനാകുന്നതല്ലെങ്കിലും താരത്തിന്റെ പകരക്കാരനെ ഒരുക്കാനുള്ള തയ്യാറെടുപ്പുകള്‍ റോയല്‍സ് ആരംഭിച്ചു കഴിഞ്ഞു.
ബട്ട്ലറുടെ പകരക്കാരനായി ടോം കോഹ്ലര്‍-കാഡ്മോര്‍ സീസണിന്റെ ശേഷിക്കുന്ന മത്സരങ്ങളില്‍ റോയല്‍സിനായി കളിക്കുമെന്ന് പ്രതീക്ഷിക്കുന്നു. ബട്ട്ലറുടെ ബാക്ക്-അപ്പായി കോഹ്ലര്‍-കാഡ്മോറിനൊപ്പം റോയല്‍സ് പരിശീലിക്കുന്നുണ്ടെന്ന് പഞ്ചാബ് കിംഗ്സിനെതിരായ മത്സരത്തിന് മുന്നോടിയായി സംസാരിക്കവേ റിയാന്‍ പരാഗ് പറഞ്ഞു.
സോമര്‍സെറ്റില്‍ നിന്നുള്ള വലംകൈയ്യന്‍ ബാറ്റര്‍ ഇതുവരെ ഐപിഎല്ലില്‍ ഇടംപിടിച്ചിട്ടില്ല. എന്നിരുന്നാലും, ടി20 ക്രിക്കറ്റില്‍ പരിചയ സമ്പന്നനായ താരമാണ് അദ്ദേഹം. ഇതുവരെ, 188 ടി20 മത്സരങ്ങളില്‍ നിന്ന്, 141 സ്ട്രൈക്ക് റേറ്റോടെ 4917 റണ്‍സ് അദ്ദേഹം നേടിയിട്ടുണ്ട്, ഇംഗ്ലീഷ് ടി20 ബ്ലാസ്റ്റിലും പാകിസ്ഥാന്‍ സൂപ്പര്‍ ലീഗിലും താരം ശ്രദ്ധേയമായ പ്രകടനം കാഴ്ചവെച്ചിട്ടുണ്ട്.
കോഹ്ലര്‍-കാഡ്മോറിനെ അടിസ്ഥാന വിലയായ 40 ലക്ഷത്തിനാണ് റോയല്‍സ് സ്വന്തമാക്കിയത്. ഐപിഎല്‍ സീസണില്‍ ജോസ് ബട്ട്ലര്‍ 11 മത്സരങ്ങളില്‍ നിന്ന് 140.78 സ്ട്രൈക്ക് റേറ്റില്‍ 39.89 ശരാശരിയില്‍ 359 റണ്‍സ് നേടി. ഇതില്‍ രണ്ട് സെഞ്ച്വറികളും ഉള്‍പ്പെടും.