ഐപിഎല്‍ 17ാം സീസണിലെ ചാമ്പ്യന്മാര്‍ ആരായിരിക്കുമെന്നതില്‍ പ്രവചനവുമായി ഇന്ത്യന്‍ മുന്‍ മലയാളി താരം എസ്. ശ്രീശാന്ത്. സഞ്ജു സാംസണിന്റെ ക്യാപ്റ്റന്‍സിയില്‍ രാജസ്ഥാന്‍ റോയല്‍സ് ഇത്തവണ കപ്പുയര്‍ത്തുമെന്ന് ശ്രീശാന്ത് പറഞ്ഞു. സ്റ്റാര്‍ നഹി ഫാര്‍ എന്ന സ്റ്റാര്‍ സ്പോര്‍ട്സിന്റെ ഷോയില്‍ സഞ്ജുവിനെ മുന്നില്‍ ഇരുത്തിയായിരുന്നു ശ്രീശാന്തിന്റെ ഈ പ്രവചനം. ഒപ്പം സഞ്ജുവിനെ റോയല്‍സിലേക്ക് എത്തിച്ചതിനെ കുറിച്ചും ശ്രീശാന്ത് വാചാലനായി.
ഞാന്‍ അന്നു സഞ്ജുവിനെക്കുറിച്ച് രാഹുല്‍ ദ്രാവിഡിനോടു പറഞ്ഞത് കള്ളമായിരുന്നെങ്കിലും അതു പിന്നീട് സത്യമായി തന്നെ സംഭവിക്കുകയായിരുന്നു. സഞ്ജുവിനു ഇപ്പോള്‍ എനിക്കെതിരേ ഒരോവറില്‍ ആറു സിക്സറുകള്‍ നേടാന്‍ കഴിയും. പക്ഷെ അന്നു അതു കഴിയില്ലായിരുന്നു.
മലയാളിയുടെ ധൈര്യവും വാശിയുമെല്ലാം സഞ്ജുവിന്റെ കൈയിലുണ്ടെന്നു അന്നു ഞാന്‍ ദ്രാവിഡിനോടു പറഞ്ഞിരുന്നു. എനിക്കു അക്കാര്യം തെളിയിക്കേണ്ടിയും ചെയ്യേണ്ടിയിരുന്നു. എനിക്കു അതു സഞ്ജുവിന്റെ കണ്ണുകളില്‍ അന്നു കാണാന്‍ സാധിച്ചിരുന്നു. ഇവന്‍ വലിയൊരു താരമാവുമെന്നു അന്നു തന്നെ എനിക്കു തോന്നിയിരുന്നു.
അതു വെറുമൊരു തുടക്കം മാത്രമായിരുന്നു. പിന്നീട് സഞ്ജു എല്ലാവര്‍ക്കെതിരേയും സിക്സറുകള്‍ വാരിക്കൂട്ടി. അങ്ങനെ ഞാന്‍ പണ്ടുപറഞ്ഞിട്ടുള്ള ആ കാര്യം സത്യമായി വരികയും ചെയ്തു. ഈയൊരു നിമിഷത്തില്‍ എനിക്കു പറയാനുളളത് ഈ വര്‍ഷത്തെ ഐപിഎല്‍ ട്രോഫി രാജസ്ഥാന്‍ റോയല്‍സിനും സഞ്ജുവിനുമായിരിക്കുമെന്നാണ്- ശ്രീശാന്ത് കൂട്ടിച്ചേര്‍ത്തു.