2024 ലെ ടി20 ലോകകപ്പിലെ വിജയത്തിലേക്ക് ഇന്ത്യയെ നയിച്ച രാഹുൽ ദ്രാവിഡ് അതിന് ശേഷം ഇന്ത്യയുടെ പരിശീലക സ്ഥാനം ഉപേക്ഷിച്ചു. ജൂൺ 29 ന് പരിശീലക സ്ഥാനം ഉപേക്ഷിച്ചത് മുതൽ ദ്രാവിഡിന്റെ പേര് പല ടീമുകളുമായി ബന്ധപ്പെട്ട് കേട്ടിരുന്നു. അതിൽ പ്രധാനം രാജസ്ഥാൻ റോയല്സിലേക്ക് എന്ന വാർത്ത ആയിരുന്നു. ഇപ്പോൾ ഇതാ അത് എല്ലാം ശരിവെച്ചുകൊണ്ട് രാഹുൽ ദ്രാവിഡ് തന്നെ രാജസ്ഥാൻ റോയൽസിന്റെ പരിശീലക സ്ഥാനത്തേക്ക്.
ESPNCricinfo യുടെ റിപ്പോർട്ട് അനുസരിച്ച്, ഐപിഎൽ 2025 സീസണിൽ രാജസ്ഥാൻ റോയൽസിൻ്റെ മുഖ്യ പരിശീലകനായി രാഹുൽ ദ്രാവിഡ് ചേരാൻ ഒരുങ്ങുകയാണ്. കളിക്കാരെ നിലനിർത്തുന്നതിനെക്കുറിച്ചും ഐപിഎൽ 2025 മെഗാ ലേലത്തിനായുള്ള അവരുടെ തന്ത്രങ്ങളെക്കുറിച്ചും പ്രാഥമിക ചർച്ചകൾ നടത്തിയ ശേഷം മുൻ പരിശീലകൻ ഫ്രാഞ്ചൈസിയുമായി ഒരു കരാർ ഒപ്പിട്ടു.
മുൻ ഇന്ത്യൻ ബാറ്റിംഗ് കോച്ച് വിക്രം റാത്തോറിനെ ദ്രാവിഡിൻ്റെ അസിസ്റ്റൻ്റ് കോച്ചായി രാജസ്ഥാൻ റോയൽസും ഒപ്പിടാൻ ഒരുങ്ങുന്നതായി റിപ്പോർട്ടിൽ പറയുന്നു. ടീം ഇന്ത്യയ്‌ക്കൊപ്പമുള്ള കാലത്ത് രാഹുൽ ദ്രാവിഡിൻ്റെ സപ്പോർട്ട് സ്റ്റാഫിലെ പ്രധാന അംഗമായിരുന്നു റാത്തോർ. ദേശീയ ക്രിക്കറ്റ് അക്കാദമിയുടെ ചുമതലയുണ്ടായിരുന്ന കാലത്തും ദ്രാവിഡിൻ്റെ സജ്ജീകരണത്തിൻ്റെ ഭാഗമായിരുന്നു അദ്ദേഹം.
നിലവിൽ രാജസ്ഥാൻ റോയൽസിൻ്റെ മുഖ്യ പരിശീലകനായ കുമാർ സംഗക്കാര ഫ്രാഞ്ചൈസിയുടെ ക്രിക്കറ്റ് ഡയറക്ടറായി തുടരും. RR-ൻ്റെ സഹോദരി ഫ്രാഞ്ചൈസികൾ, SA20 ലെ പാർൾ റോയൽസ്, കരീബിയൻ പ്രീമിയർ ലീഗിൽ ബാർബഡോസ് റോയൽസ് എന്നിവയുടെ മുഖ്യ പരിശീലകനായി അദ്ദേഹം ചുമതലകൾ നിർവഹിക്കും.