പഞ്ചാബ് കിംഗ്‌സിന്റെ ഈ സീസണിലെ പ്രതീക്ഷകളെക്കുറിച്ച് സംസാരിച്ചിരിച്ചിരിക്കുകയാണ് മുൻ ഇന്ത്യൻ താരം റോബിൻ ഉത്തപ്പ. 2008 ൽ ടൂർണമെന്റ് ആരംഭിച്ചതിനുശേഷം ഇതുവരെ കിരീടത്തിൽ മുത്തമിടാൻ സാധികാത്ത ടീമാണ് പഞ്ചാബ് കിങ്‌സ്. ഒന്നോ രണ്ടോ തവണ ഒഴികെ മികച്ച പ്രകടനം നടത്തിയത് ഒഴിച്ചാൽ ബാക്കി എല്ലാ സീസണില് പഞ്ചാബ് ആരാധകരെ നിരാശരാക്കി. കളിക്കാരെയും പരിശീലകരെയും അവർ പല തവണ ഈ കാലഘത്തിൽ മാറ്റിയിട്ടുണ്ടെങ്കിലും ഫലങ്ങൾ മാത്രം ശരിയായില്ല എന്ന് പറയാം. എന്നിരുന്നാലും, ലീഗിന്റെ 18-ാം സീസണിൽ കിരീടം നേടാൻ സാധ്യതയുള്ള ടീമാണ് പഞ്ചാബ് എന്ന് പറഞ്ഞിരിക്കുകയാണ് റോബിൻ ഉത്തപ്പ ഇപ്പോൾ.
ഇന്നലെ നടന്ന ആവേശ പോരാട്ടത്തിൽ പഞ്ചാബ് കിങ്‌സ് തങ്ങളുടെ സീസണിലെ ആദ്യ പോരിൽ ഗുജറാത്ത് ടൈറ്റൻസിനെ തോൽപ്പിച്ച് ആവേശ ജയം സ്വന്തമാക്കിയിരുന്നു. വന്നവനായും നിന്നവനും പോയവയും എല്ലാം അടിച്ച പോരിൽ 243 റൺസ് വിജയലക്ഷ്യം പിന്തുടർന്ന ഗുജറാത്തിന് 20 ഓവറിൽ അഞ്ച് വിക്കറ്റ് നഷ്ടത്തിൽ 232 റൺസെടുക്കാനാണ് സാധിച്ചത്.
“2025 ലെ ഐപിഎല്ലിൽ അവർ കടലാസ് രാജാക്കന്മാരാകില്ല, പക്ഷേ ഈ സീസണിൽ അവർ യഥാർത്ഥ രാജാക്കന്മാരായിരിക്കും. പഞ്ചാബ് കിംഗ്‌സ് നല്ലൊരു ടീമിനെ ഒരുക്കിയിട്ടുണ്ട്. അവരുടെ പ്രകടനത്തിനായി ഞാൻ ആകാംക്ഷയോടെ കാത്തിരിക്കുകയാണ്,” റോബിൻ ഉത്തപ്പ സ്റ്റാർ സ്പോർട്സിൽ പറഞ്ഞു.
എന്തായാലും ശ്രേയസ് അയ്യരും ഒരു കൂട്ടം ചെറുപ്പക്കാരും ഒത്തുചേരുന്ന പഞ്ചാബ് ടീം ഈ സീസണിൽ അത്ഭുതങ്ങൾ കാണിക്കും എന്നാണ് ആരാധകരുടെ പ്രതീക്ഷ.
