ഐപിഎൽ 2024 ഉദ്ഘാടന മത്സരത്തിന് ഒരു ദിവസം മുമ്പ്, ചെന്നൈ സൂപ്പർ കിംഗ്‌സിൻ്റെ ക്യാപ്റ്റൻ സ്ഥാനം ഒഴിഞ്ഞ് റുതുരാജ് ഗെയ്‌ക്‌വാദിന് ആ റോൾ കൈമാറാനുള്ള അദ്ഭുതകരമായ തീരുമാനമാണ് എംഎസ് ധോണി എടുത്തത്. മുൻ ഇന്ത്യൻ ഓപ്പണർ വസീം ജാഫർ, ധോണിയുടെ പ്രഖ്യാപനത്തെയും അത് എടുത്ത സമയത്തെയും ചോദ്യം ചെയ്ത് രംഗത്ത് വന്നിരിക്കുകയാണ്. ഗെയ്‌ക്‌വാദ് ഇന്നലെ ക്യാപ്റ്റൻമാരുടെ ഫോട്ടോഷൂട്ടിൽ പ്രത്യക്ഷപ്പെട്ടതിന് പിന്നാലെയാണ് ആരാധകർക്ക് ആദ്യ ഷോക്ക് കിട്ടിയത്. ഏതാനും മിനിറ്റുകൾക്കകം സിഎസ്‌കെ ഔദ്യോഗിക പ്രഖ്യാപനം നടത്തി.
ഈ സീസണിൽ കൂടി ധോണി നായകസ്ഥാനത്തു തുടരുമെന്നാണ് പ്രതീക്ഷിക്കപ്പെട്ടത്. ഇന്ത്യൻ ക്രിക്കറ്റിലെ എക്കാലത്തെയും മികച്ച നായകരിലൊരാളായ എംഎസ് ധോണി സിഎസ്‌കെയെ അഞ്ച് തവണ കിരീടത്തിലേക്ക് നയിച്ച നായകനാണ്. ചെന്നൈ സൂപ്പർ കിങ്സ് എന്ന് കേൾക്കുമ്പോൾ തന്നെ മഞ്ഞക്കുപ്പായത്തിൽ കളത്തിലിറങ്ങുന്ന ധോണിയുടെ രൂപമാകും ഐപിഎൽ ആരാധകരുടെ മനസിലെത്തുക. ചെന്നൈ എന്നാൽ ധോണി തന്നെയാണ് എന്നും പറയാം.
ധോണിയുമായി ബന്ധപ്പെട്ട് ജാഫർ പറഞ്ഞത് ഇങ്ങനെയാണ്:
“ധോണി ടീമിൽ ഇപ്പോഴും കളിക്കുന്നത് ഋതുരാജിന് കാര്യങ്ങൾ ബുദ്ധിമുട്ട് ഉണ്ടാക്കും. ധോണിയുടെ സാന്നിധ്യവും സ്വാധീനവും ഉള്ളതിനാൽ, ഏതൊരു പുതിയ ക്യാപ്റ്റനും ടെൻഷനാകും, കാരണം പുതിയ ക്യാപ്റ്റൻ്റെ തീരുമാനങ്ങളെ ധോണി ചോദ്യം ചെയ്യുകയോ വിയോജിക്കുകയോ ചെയ്തേക്കാം. ക്യാപ്റ്റൻസിയുടെ വ്യക്തമായ പിൻഗാമി ഗെയ്‌ക്‌വാദാണെന്ന് ജാഫർ കരുതുന്നു, എന്നാൽ ധോണി ഉള്ളപ്പോൾ അദ്ദേഹത്തെ കൊണ്ടുവരുന്നത് ഒരു മോശം അന്തരീക്ഷം സൃഷ്ടിക്കും.”
“എംഎസ് ധോണിയുടെ വിരമിക്കൽ പ്രഖ്യാപനം വന്നെങ്കിൽ പുതിയ നായകന് കാര്യങ്ങൾ എളുപ്പം ആകുമായിരുന്നു. പുതിയ ക്യാപ്റ്റൻ്റെ തീരുമാനങ്ങളോട് അദ്ദേഹം യോജിക്കുന്നുണ്ടോ എന്നത് പരിഗണിക്കാതെ തന്നെ അദ്ദേഹത്തിൻ്റെ സാന്നിധ്യം കാര്യങ്ങൾ സങ്കീർണ്ണമാക്കും. ധോണി ഇപ്പോഴും ടീമിൽ സ്വാധീനം ചെലുത്തിയില്ലെങ്കിൽ റുതുരാജ് ഗെയ്‌ക്‌വാദിലേക്കുള്ള നേതൃമാറ്റം സുഗമമാകുമായിരുന്നു.”
ഐപിഎല്ലിൽ 250 മത്സരങ്ങൾ കളിച്ചിട്ടുള്ള ധോണി 135.92 സ്ട്രൈക്ക് റേറ്റിൽ 5000-ത്തിലധികം റൺസ് നേടിയിട്ടുണ്ട്. ഫിറ്റ്നസ് പ്രശ്നങ്ങൾ കാരണം കഴിഞ്ഞ സീസണിൽ 8-ാം നമ്പർ സ്ലോട്ടിലാണ് അദ്ദേഹം ബാറ്റ് ചെയ്തത്. എന്നാൽ പുതിയ പതിപ്പിൽ താരം കൂടുതൽ ബാറ്റ് ചെയ്യുമെന്ന് പ്രതീക്ഷിക്കുന്നു.