ഇന്ത്യൻ പ്രീമിയർ ലീഗ് 2023 മത്സരങ്ങളിൽ ചെന്നൈ സൂപ്പർ കിംഗ്‌സിന് വേണ്ടി കളിക്കുന്നുണ്ടെങ്കിലും ഓൾറൗണ്ടർ ദീപക് ചാഹർ ഇപ്പോഴും ‘100% ഫിറ്റ്’ അല്ല എന്നാണ് പുറത്തുവരുന്ന റിപോർട്ടുകൾ. 2023 ലോകകപ്പും 2023 ഏഷ്യാ കപ്പും അടുത്തുവരുമ്പോൾ, ഇതിനകം തന്നെ പരിക്കേറ്റ ടീം ഇന്ത്യയിലേക്ക് എങ്ങനെ എങ്കിലും കടന്നുകയറാനുള്ള അവസരങ്ങൾ ഉപയോഗിക്കാനാണ് പരിക്കുണ്ടായിട്ടും അതുമായി കളിക്കാൻ തീരുമാനിച്ചത്. എന്നാൽ ഈ റിസ്ക്ക് എത്രത്തോളം ഫലം തരും എന്നുള്ളത് കണ്ടറിയണം.
ഒരു മാസത്തിലേറെയായി ഐപിഎൽ 2023-ൽ നിന്ന് തന്നെ മാറ്റിനിർത്തിയ ഹാംസ്ട്രിംഗ് രോഗത്തിൽ നിന്ന് താൻ ഇപ്പോഴും പൂർണ്ണമായി സുഖം പ്രാപിച്ചിട്ടില്ലെന്ന് ദീപക് ചാഹർ ബുധനാഴ്ച നടന്ന മത്സരത്തിന് പിന്നാലെ സമ്മതിച്ചു. എന്തായാലും ഇതുവരെ 6 ഐ.പി.എൽ മത്സരങ്ങൾ ഈ സീസണിൽ കളിച്ച താരം 4 വിക്കറ്റുകളാണ്‌ നേടിയത്. മുംബൈ ചെന്നൈ ഈ സീസണിലെ അവസാനം ഏറ്റുമുട്ടിയ മത്സരത്തിൽ ദീപക്ക് 2 വിക്കറ്റ് നേടിയിരുന്നു.ബുധനാഴ്ച, ഡൽഹി ക്യാപിറ്റൽസിനെതിരായ സിഎസ്‌കെയുടെ വിജയത്തിൽ ഡേവിഡ് വാർണറുടെയും ഫിൽ സാൾട്ടിന്റെയും രണ്ട് നിർണായക വിക്കറ്റുകളും അദ്ദേഹം നേടി.
“പരിക്കുകളാൽ ഞാൻ ബുദ്ധിമുട്ടുന്നു, ഓരോ തവണയും നിങ്ങൾക്ക് പരിക്കേൽക്കുമ്പോൾ നിങ്ങൾ പൂജ്യത്തിൽ നിന്ന് ആരംഭിക്കുന്നു. ഇപ്പോഴും 100% ഫിറ്റ് അല്ല, പക്ഷേ ടീമിന് സംഭാവന നൽകാൻ ഞാൻ ശ്രമിക്കുന്നു, ”മത്സരത്തിന് ശേഷം വികാരാധീനനായ ചാഹർ പറഞ്ഞു.
കഴിഞ്ഞ 18 മാസത്തിനിടെ ചാഹറിന് നിരവധി പരിക്കുകൾ വന്നു . മെഗാ ലേലത്തിൽ 14 കോടി രൂപയ്ക്ക് സ്വന്തമാക്കിയതിന് ശേഷം, ഐപിഎൽ 2022 സീസൺ മുഴുവൻ കളിക്കാൻ അദ്ദേഹത്തിന് കഴിഞ്ഞില്ല, കൂടാതെ 2022 ടി 20 ലോകകപ്പും നഷ്‌ടമായി.