ഓസ്‌ട്രേലിയയ്‌ക്കെതിരായ ടെസ്റ്റ് പരമ്പരയില്‍ ബാറ്റു കൊണ്ട് മികച്ച പ്രടനമാണ് ഇന്ത്യന്‍ യുവതാരം റിഷഭ് പന്ത് കാഴ്ച വെച്ചത്. നാലാം ടെസ്റ്റിലെ രണ്ടാം ഇന്നിംഗ്‌സില്‍ 138 പന്തില്‍ 89 റണ്‍സ് നേടി പുറത്താകാതെ നിന്ന പന്തിന്റെ മികവിലാണ് മത്സരത്തില്‍ ഇന്ത്യ 3 വിക്കറ്റിന്റെ ആവേശവിജയം നേടിയതും പരമ്പര 2-1 ന് സ്വന്തമാക്കിയതും. ഇപ്പോഴിതാ തന്നെ ധോണിയടക്കമുള്ള താരങ്ങളുമായി താരതമ്യം ചെയ്യുന്നതിനോട് പ്രതികരിച്ചിരിക്കുകയാണ് താരം. തനിക്ക് തന്റേതായ ഒരിടമാണ് വേണ്ടതെന്ന് പന്ത് പറയുന്നു.
“ബോര്‍ഡര്‍ ഗാവസ്‌കര്‍ ട്രോഫി നിലനിര്‍ത്താന്‍ സാധിച്ചതില്‍ ഒരുപാട് സന്തോഷമുണ്ട്. ടീം വളരെ സന്തോഷത്തിലാണ്. ധോണിയെ പോലൊരു വ്യക്തിയുമായി താരതമ്യപ്പെടുത്തുന്നതില്‍ സന്തോഷമുണ്ട്. എന്നാല്‍ അങ്ങനെ താരതമ്യം ചെയ്യുന്നതിനോട് താത്പര്യമില്ല. ഇന്ത്യന്‍ ക്രിക്കറ്റ് ടീമില്‍ എന്റെ പേര് എഴുതി ചേര്‍ക്കാനാണ് ആഗ്രഹം.”
“എനിക്ക് എന്റേതായ ഇടം വേണം. അതിലേക്കാണ് എല്ലാ ശ്രദ്ധയും. മാത്രമല്ല ഇതിഹാസതാരവുമായി ഒരു യുവതാരത്തെ താരതമ്യം ചെയ്യുന്നത് ശരിയാണെന്ന് കരുതുന്നില്ല” പന്ത് പറഞ്ഞു.
കരിയറിന്റെ ആരംഭം മുതല്‍ ധോണിയുമായി താരതമ്യം ചെയ്യപ്പെടുന്ന വിക്കറ്റ് കീപ്പര്‍ ബാറ്റ്‌സ്മാനാണ് റിഷഭ് പന്ത്. എന്നാല്‍ സ്ഥിരതയില്ലായ്മ താരത്തെ പലപ്പോഴും പിന്നോട്ടടിക്കുന്നു. ഓസീസ് പര്യടനത്തില്‍ ആദം ഗില്‍ക്രിസ്റ്റുമായും പന്ത് താരതമ്യം ചെയ്യപ്പെട്ടു. ഇന്ത്യയുടെ ആദം ഗില്‍ക്രിസ്റ്റ് എന്നതാണ് പന്തിനുള്ള പുതിയ വിശേഷണം.