പെര്‍ത്തില്‍ ഇന്ത്യയുടെ രണ്ടാമത്തെ മാത്രം ടെസ്റ്റ് വിജയമാണ്. വിലമതിക്കാനാവാത്തത് എന്ന് തന്നെ പറയണം.സബ് കൊണ്ടിനെന്റല്‍ ബാറ്റര്‍മാരെ വലക്കുന്ന പേസും ബൗണ്‍സും മൂവ് മെന്റും നിറഞ്ഞു നില്‍ക്കുന്ന വാക്ക എന്നുമവര്‍ക്കൊരു പേടിസ്വപ്നം തന്നെയായിരുന്നു. വാക്ക ഇപ്പോള്‍ പഴയ വാക്ക അല്ലെങ്കില്‍ പോലും ഈ ട്രാക്കില്‍ അതിജീവനം ദുഷ്‌കരം തന്നെയാണ് എന്നത് നമ്മള്‍ കണ്ടിരിക്കുകയാണ്. പെര്‍ത്തില്‍ ഓസീസ് പേസര്‍മാരുടെ പേസിനും ബൗണ്‍സിനും അതേ നാണയത്തിലല്ല അതിലും കൂടിയ അളവില്‍ തിരിച്ചടി ലഭിക്കുന്നു..
ഇവിടെ ആദ്യ ഇന്നിങ്ങ്‌സിലെ തകര്‍ച്ച ഒരു വന്‍ പരാജയത്തിലേക്ക് നയിച്ചിരുന്നെങ്കില്‍ അത് ഇന്ത്യയെ ഒരു പക്ഷെ ഈ പരമ്പരയില്‍ നിന്നു തന്നെ മാനസികമായി പുറത്താക്കുമായിരുന്നു എന്ന സാധ്യത മുന്നില്‍ നില്‍ക്കെ ഇന്ത്യയുടെ പേസ് ത്രയം വെല്ലുവിളി ഏറ്റെടുക്കുകയാണ്. ക്യാപ്റ്റന്‍ ജസ്പ്രീത് ബുമ്ര മുന്നില്‍ നിന്നു നയിക്കുന്നു സിറാജും ഹര്‍ഷിത് റാണയും ശക്തമായ പിന്തുണ നല്‍കുന്നു. മോര്‍ണിംഗ് സെഷനായാലും ലഞ്ചിനു ശേഷമായാലും വൈകിട്ടായാലും ആക്രമണത്തിലേക്ക് വരുമ്പോള്‍ സിറാജും ഹര്‍ഷിതും ഒരേ തീക്ഷ്ണതയോടെ ആക്രമിക്കുന്നത് കണ്ടിരിക്കാന്‍ തന്നെ രസമായിരുന്നു.
ഓസീസ് അവരുടെ സ്വന്തം തട്ടകത്തില്‍, അവര്‍ക്ക് പരിചിതമായ പേസും ബൗണ്‍സും മൂവ് മെന്റും ഉള്ളൊരു ട്രാക്കില്‍ ഒരേയൊരു ജസ്പ്രീത് ബുമ്രയുടെ വെള്‍ഡ് ക്ലാസ് സ്‌പെല്ലുകള്‍ക്ക് മുന്നില്‍ വീഴുന്നു. ബുമ്രയുടെ ഇന്‍വെഡ് & ഔട്ട് വെഡ് മൂവ് മെന്റ് ഹാന്‍ഡില്‍ ചെയ്യാന്‍ ഓസീസ് ബാറ്റര്‍മാര്‍ക്ക് കഴിഞ്ഞില്ല. ബുമ്ര കഴിഞ്ഞാല്‍ എടുത്തു പറയേണ്ടത് കെ.എല്‍ രാഹുല്‍-ജയ് സ്വാള്‍ ഓപ്പണിംഗ് പാര്‍ട്ണര്‍ഷിപ്പാണ്. ഓസ്ട്രേലിയക്ക് ബാക്കിയുണ്ടായിരുന്ന പ്രതീക്ഷയും തല്ലിക്കെടുത്തി അവരുടെ റീച്ചിന് അപ്പുറത്തേക്ക് ഗെയിം കൊണ്ട് പോയ സോളിഡ് പാര്‍ട്ണര്‍ ഷിപ്. രാഹുല്‍ വാസ് ഔട്ട് സ്റ്റാന്‍ഡിങ്, ജയ് സ്വാള്‍ ഒരു ലെജന്‍ഡറി കരിയറിന്റെ തുടക്കമിട്ട് കഴിഞ്ഞു, കൂടെ വിരാട് കോഹ്ലിയും ഫോമിലേക്ക് വരുന്നു.
ഓവര്‍ സീസ് പര്യടനങ്ങളില്‍ പേസും ബൗണ്‍സുമുള്ള ട്രാക്കുകള്‍ ഒരുക്കി ഇന്ത്യയെ ഇന്റിമിഡെറ്റ് ചെയ്യാമെന്ന വ്യാമോഹം അവസാനിച്ചിട്ട് കൊല്ലം കുറെയായെങ്കിലും അതൊരിക്കല്‍ കൂടെ ഓര്‍മപ്പെടുത്തപ്പെടുകയാണ്. ഇന്ത്യക്ക് ഇത്തരം ട്രാക്കുകളില്‍ കളി ജയിപ്പിക്കാന്‍ മാത്രം ഉന്നത നിലവാരമുള്ളൊരു പേസ് ബൗളിംഗ് നിരയുണ്ട്. പരിക്കേറ്റവര്‍ക്ക് പകരം വരുന്ന പേസര്‍മാര്‍ക്ക് വരെ ക്വാളിറ്റിയുമുണ്ട്.
എഴുത്ത്: സംഗീത് ശേഖര്‍
കടപ്പാട്: മലയാളി ക്രിക്കറ്റ് സോണ്‍