ദക്ഷിണാഫ്രിക്കയ്‌ക്കെതിരായ നാല് ഗെയിമുകളുടെ ടി20 ഐ പരമ്പരയുടെ ഉദ്ഘാടന മത്സരത്തിലെ തകർപ്പൻ വിജയത്തിന് പിന്നാലെ ഇന്ത്യൻ ടീമിനെ അഭിനന്ദിച്ച് രംഗത്ത് എത്തിയിരിക്കുകയാണ് ബിസിസിഐ സെക്രട്ടറി ജയ് ഷാ . ഇന്നലെ ഡർബനിലെ കിംഗ്സ്മീഡിലാണ് മത്സരം നടന്നത്. സഞ്ജു സാംസൺ ആണ് ഇന്ത്യൻ വിജയത്തിൽ നിർണായക പങ്ക് വഹിച്ചത്.
ആദ്യം ബാറ്റ് ചെയ്യാൻ ആവശ്യപ്പെട്ട സഞ്ജു സാംസൺ ശ്രദ്ധേയമായ ഇന്നിംഗ്‌സ് കളിച്ചു, വെറും 47 പന്തിൽ തൻ്റെ തുടർച്ചയായ രണ്ടാം ടി20 സെഞ്ച്വറി നേടി. 50 പന്തിൽ ഏഴ് ഫോറും 10 സിക്‌സും ഉൾപ്പെടെ 107 റൺസാണ് താരം നേടിയത്. തിലക് വർമ്മയും വിലപ്പെട്ട സംഭാവന നൽകി, 18 പന്തിൽ 33 റൺസ് കൂട്ടിച്ചേർത്തു, ഇന്ത്യ അവരുടെ 20 ഓവറിൽ 202/8 എന്ന നിലയിൽ എത്തി.
മറുപടി ബാറ്റിങ്ങിനിറങ്ങിയ സന്ദർശകർക്ക് ആദ്യ ഓവറിൽ തന്നെ ക്യാപ്റ്റൻ എയ്ഡൻ മർക്രമിനെ നഷ്ടമായി. അവിടെ നിന്ന് കൃത്യമായ ഇടവേളകളിൽ വിക്കറ്റ് വീഴ്ത്തി ഇന്ത്യയുടെ ബൗളർമാർ സൗത്താഫ്രിക്കയെ നിലയുറപ്പിക്കാൻ സമ്മതിച്ചില്ല. വരുൺ ചക്രവർത്തിയും രവി ബിഷ്‌ണോയിയും മൂന്ന് വിക്കറ്റ് വീതം വീഴ്ത്തിയപ്പോൾ ദക്ഷിണാഫ്രിക്ക 141ന് പുറത്തായി.
ഇന്ത്യയുടെ 61 റൺസിൻ്റെ വിജയത്തോട് പ്രതികരിച്ച്, കളിക്കാരുടെ മികച്ച പ്രയത്നങ്ങളെ പ്രശംസിക്കാൻ ജയ് ഷാ ഇങ്ങനെ കുറിച്ചു:
“പ്രോട്ടീസിനെതിരായ ടി20 ഐ പരമ്പരയിൽ ഇന്ത്യക്ക് മികച്ച തുടക്കം! അപകടകരമായ ബാറ്റിംഗ് നിര എതിരാളി ആയി വന്നപ്പോൾ അവർക്ക് മുന്നിൽ മികച്ച സ്കോർ പടുത്തുയർത്താൻ ആയി. തുടർച്ചയായ രണ്ടാം സെഞ്ചുറിക്ക് സഞ്ജു സാംസണ് പ്രത്യേക അഭിനന്ദനം. രവി ബിഷ്‌ണോയി, വരുൺ ചക്രവർത്തി തുടങ്ങിയവരും നന്നായി കളിച്ചു.” ഷാ എഴുതി.
പരമ്പരയിലെ രണ്ടാമത്തെ ടി 20 നാളെ നടക്കുമ്പോൾ ജയം തുടരുകയാണ് ഇന്ത്യൻ ലക്‌ഷ്യം.