തന്നെ ടെസ്റ്റ് ക്രിക്കറ്റില്‍ നിന്ന് വിരമിക്കാന്‍ നിര്‍ബന്ധിച്ചതിന് ഹെഡ് കോച്ച് ബ്രണ്ടന്‍ മക്കല്ലത്തോടും ക്യാപ്റ്റന്‍ ബെന്‍ സ്റ്റോക്‌സിനോടും ഭാര്യക്ക് ഇപ്പോഴും ദേഷ്യമാണെന്ന് ഇംഗ്ലണ്ട് ഇതിഹാസ ബോളര്‍ ജെയിംസ് ആന്‍ഡേഴ്‌സണ്‍. തന്റെ നിബന്ധനകള്‍ക്ക് അനുസൃതമായി തന്റെ ഭര്‍ത്താവിനെ വിരമിക്കാന്‍ അനുവദിക്കണമായിരുന്നുവെന്നും അദ്ദേഹം ഇപ്പോഴും ഇംഗ്ലണ്ടിനായി കളിക്കണമെന്നുമാണ് അവര്‍ വിശ്വസിക്കുന്നത്.
2025/26 ആഷസിന് തയ്യാറെടുക്കാന്‍ പുതിയ ബോളര്‍മാരെ പരീക്ഷിക്കാന്‍ ആഗ്രഹിക്കുന്നതിനാല്‍ മക്കല്ലവും സ്റ്റോക്‌സും മാനേജിംഗ് ഡയറക്ടര്‍ റോബര്‍ട്ട് കീയും ആന്‍ഡേഴ്‌സണോട് വിരമിക്കാന്‍ പറഞ്ഞിരുന്നു. വലംകൈയ്യന്‍ സീമര്‍ തന്റെ 188-ാമത്തേതും അവസാനത്തേതുമായ ടെസ്റ്റ് മത്സരം 2024 ജൂലൈയില്‍ ലോര്‍ഡ്സില്‍ വെസ്റ്റ് ഇന്‍ഡീസിനെതിരെ കളിച്ചു. ദി ഗാര്‍ഡിയനോട് സംസാരിക്കവേ, തന്റെ ഭാര്യ എപ്പോഴും തന്നെ പിന്തുണച്ചിട്ടുണ്ടെന്നും വെല്ലുവിളി നിറഞ്ഞ സമയങ്ങളില്‍ തന്റെ കൂടെയുണ്ടായിരുന്നുവെന്നും ആന്‍ഡേഴ്‌സണ്‍ പറഞ്ഞു.
അവള്‍ ഇപ്പോഴും ദേഷ്യത്തിലാണ്. അവള്‍ എന്റെ ഏറ്റവും വലിയ പിന്തുണയായിരുന്നു. പരിക്കിന്റെ സമയത്ത് എന്നെ പ്രചോദിപ്പിച്ചു. ടീം മാനേജ്മെന്റ് എന്നോട് വിരമിക്കാന്‍ പറഞ്ഞത് അവള്‍ക്ക് ഇഷ്ടപ്പെട്ടില്ല. മറ്റൊരാളുടെ തീരുമാനപ്രകാരമല്ല, സ്വന്തം നിബന്ധനകള്‍ക്ക് വിധേയമായി ഞാന്‍ വിരമിക്കണമെന്ന് അവള്‍ ആഗ്രഹിച്ചു.
ദേഷ്യം വന്നില്ലെങ്കിലും പ്ലാനുകള്‍ അറിഞ്ഞപ്പോള്‍ ഞെട്ടിപ്പോയി. എന്റെ ശരീരം എന്നെ അനുവദിക്കുന്നിടത്തോളം കാലം ഞാന്‍ ഇംഗ്ലണ്ടിനായി കളിക്കുമായിരുന്നു. ഒരുപക്ഷേ, പോകാനുള്ള സമയമായെന്ന് എന്നെ ഓര്‍മ്മിപ്പിക്കാന്‍ എനിക്കിത് ആവശ്യമായിരുന്നിരിക്കാം- ആന്‍ഡേഴ്‌സണ്‍ പറഞ്ഞു.
Read more
അതേസമയം വരാനിരിക്കുന്ന ഐപിഎല്‍ 2025 മെഗാ ലേലത്തിനായി ആന്‍ഡേഴ്‌സണ്‍ സ്വയം രജിസ്റ്റര്‍ ചെയ്തു. ടൂര്‍ണമെന്റിന്റെ ഭാഗമാകാന്‍ താന്‍ ആഗ്രഹിക്കുന്നെന്നും അത് ഒരു അത്ഭുതകരമായ ലീഗാണെന്നാണ് എല്ലാവരും പറയുന്നതെന്നും ആന്‍ഡേസ്ണ്‍ പറഞ്ഞു.
