ഇംഗ്ലണ്ട് താരം ജേസണ്‍ റോയ് ഐപിഎല്‍ 2022ല്‍ നിന്ന് പിന്മാറി. ബോയോ ബബളില്‍ കൂടുതല്‍ കാലം തുടരുകയെന്ന വെല്ലുവിളി ചൂണ്ടിക്കാട്ടിയാണ് താരത്തിന്റെ പിന്മാറ്റം. ലേലത്തില്‍ 2 കോടി അടിസ്ഥാന വിലയ്ക്ക് ഗുജറാത്ത് ടൈറ്റന്‍സ് സ്വന്തമാക്കിയ താരമാണ് ജേസണ്‍ റോയ്. പകരക്കാരനെ ടൈറ്റന്‍സ് ഇതുവരെ തീരുമാനിച്ചിട്ടില്ല. ഹാര്‍ദ്ദിക് പാണ്ഡ്യയാണ് ടീമിന്‍റെ നായകന്‍.
31 കാരനായ റോയ് അടുത്തിടെ പിഎസ്എല്ലില്‍ മികച്ച പ്രകടനമാണ് കാഴ്ചവെച്ചത്. ആറ് മത്സരങ്ങള്‍ മാത്രം കളിച്ചിട്ടും ടൂര്‍ണമെന്റിലെ മികച്ച ബാറ്റര്‍മാരില്‍ ഒരാളായിരുന്നു അദ്ദേഹം. ലീഗില്‍ ഗ്ലാഡിയേറ്റേഴ്‌സിന്റെ താരമായ റോയ് 50.50 ശരാശരിയിലും 170.22 സ്ട്രൈക്ക് റേറ്റിലും 303 റണ്‍സ് നേടി. രണ്ട് അര്‍ദ്ധ സെഞ്ച്വറിയും ഒരു സെഞ്ച്വറിയും ഇതിലുള്‍പ്പെടും.
ഇത് രണ്ടാം തവണയാണ് ലേലത്തില്‍ ടീമിനെ കണ്ടെത്തിയതിന് ശേഷം ഐപിഎല്‍ കളിക്കേണ്ടെന്ന് റോയ് തീരുമാനിക്കുന്നത്. 2020-ല്‍, ഡല്‍ഹി ക്യാപിറ്റല്‍സ് റോയിയെ അന്നത്തെ അടിസ്ഥാന വിലയായ 1.5 കോടി രൂപയ്ക്ക് സ്വന്തമാക്കിയിരുന്നു. എന്നാല്‍ വ്യക്തിപരമായ കാരണങ്ങള്‍ ചൂണ്ടിക്കാട്ടി അന്നും താരം പിന്മാറി.
Read more
ഇന്ത്യന്‍ പ്രീമിയര്‍ ലീഗ് ക്രിക്കറ്റില്‍ മാര്‍ച്ച് 26 ന് കളി തുടങ്ങും. മെയ് 29 നാണ് ഫൈനല്‍. മൊത്തം 74 കളികളില്‍ 70 കളികളും നടക്കുന്നത് മുംബൈയിലെ വാങ്കഡേ, ബ്രോബോണ്‍, ഡി വൈ പാട്ടീല്‍, ഗഹുഞ്ചേ സ്റ്റേഡിയങ്ങളിലായിരിക്കും. 20 മത്സരങ്ങള്‍ വീതം വാങ്കഡേ, ഡിവൈ പാട്ടീല്‍ സ്റ്റേഡിയങ്ങളിലും 15 കളികള്‍ വീതം ബ്രാബോണ്‍, ഗഹുഞ്ചേ സ്റ്റേഡിയങ്ങളിലും നടക്കും.
