ലീഡ്‌സ് ടെസ്റ്റിലെ തോല്‍വിക്കു പിന്നാലെ വിരാട് കോഹ്ലിയെ ഉപദേശിച്ചും ക്യാപ്റ്റന്‍സിയെ വിമര്‍ശിച്ചും ചിലരൊക്കെ രംഗത്തു വന്നിരുന്നു. മുന്‍ ഇന്ത്യന്‍ ബാറ്റ്‌സ്മാന്‍ വിനോദ് കാംബ്ലിയും വിരാടിനോട് ചിലത് പറഞ്ഞു. എന്നാല്‍ സോഷ്യല്‍ മീഡിയ കാംബ്ലിയെ എടുത്തിട്ടങ്ങ് അലക്കി.
താന്‍ ക്യാപ്റ്റനായിരുന്നാല്‍ ചെയ്യുന്ന കാര്യങ്ങളാണ് കാംബ്ലി കോഹ്ലിയോട് ഉപദേശ രൂപേണ പറഞ്ഞത്. ”അജിന്‍ക്യ രഹാനെയ്ക്ക് വിശ്രമം നല്‍കേണ്ട സമയമാണിത്. എന്നിട്ട് സൂര്യകുമാര്‍ യാദവിനെ ടീമില്‍ ഉള്‍പ്പെടുത്തണം. നാല് ഫാസ്റ്റ് ബൗളര്‍മാരെ കളിപ്പിക്കുന്നതിനു പകരം അശ്വിന് അവസരം നല്‍കണം. ഞാനായിരുന്നു ക്യാപ്റ്റനെങ്കില്‍ മധ്യനിരയെപറ്റി ഒരോ കളിക്കാരനോടും സംസാരിക്കുകയും അവരുടെ ആത്മവിശ്വാസം ഉയര്‍ത്തുകയും ചെയ്യുമായിരുന്നു”-എന്നാണ് കാംബ്ലി ട്വീറ്റ് ചെയ്തത്.
ഇത് അപമാനകരമാണ് മുംബൈ ലോബി. ഇന്ത്യ തോറ്റതു ശരി തന്നെ. പക്ഷപാതം നമുക്ക് മാറ്റിവെയ്ക്കാം. സൂര്യകുമാര്‍ ടീമില്‍ സ്ഥാനം അര്‍ഹിക്കുന്നു. എന്നാല്‍ മായങ്കും വിഹാരിയും അവസരം കാത്തിരിപ്പുണ്ട്. സൂര്യകുമാറിനെ ലോക കപ്പില്‍ നാലാം നമ്പറില്‍ കളിപ്പിക്കണമെന്ന് പറയുന്ന ഒരാളില്‍ നിന്നാണ് ഈ അഭിപ്രായം വന്നതെന്ന് ഓര്‍ക്കണം. നിഷ്പക്ഷനാകൂ.. ഇന്ത്യയാണ് ആദ്യം. മുംബൈ രണ്ടാമതാണ് മിസ്റ്റര്‍ കാംബ്ലി എന്നായിരുന്നു ട്വിറ്ററില്‍ വന്ന ഒരു മറുപടി.
നിങ്ങള്‍ ട്വിറ്റര്‍ വിട്ടുപോകേണ്ട സമയമായി കാംബ്ലി. സൂര്യകുമാര്‍ വിക്കറ്റ് കീപ്പര്‍ക്കോ സ്ലിപ്പിലോ ക്യാച്ച് നല്‍കിയാല്‍ നിങ്ങള്‍ ശ്രേയസ് അയ്യറെ പകരം കളിപ്പിക്കുമോ എന്നായിരുന്നു ഒരു ക്രിക്കറ്റ് ആരാധകന്റെ ചോദ്യം. കഴിഞ്ഞ രണ്ടു വര്‍ഷമായി രഹാനെയാണ് ഇന്ത്യയുടെ ഏറ്റവും മികച്ച ബാറ്റ്‌സ്മാനെന്നും താരത്തെ മാറ്റേണ്ട കാര്യമില്ലെന്നും നാല് പേസര്‍മാരെ കളിപ്പിക്കേണ്ടതുണ്ടെന്നും കാംബ്ലിക്ക് മറുപടി നല്‍കിയവരുമുണ്ട്.