2023-ല്‍ ഇന്ത്യയില്‍ നടക്കുന്ന ഏകദിന ലോക കപ്പിന്റെ മെന്ററായി കെയ്ന്‍ വില്യംസണെ ടീമിൽ ഉൾപ്പെടുത്താന്‍ തീരുമാനിച്ച് ന്യൂസിലന്‍ഡ് ടീം മാനേജ്മെന്റ്. ഇന്ത്യന്‍ പ്രീമിയര്‍ ലീഗില്‍ ഗുജറാത്ത് ടൈറ്റന്‍സിനായി കളിക്കുന്നതിനിടെ പരിക്കേറ്റ കിവി സ്റ്റാര്‍ ബാറ്റര്‍ ടീം മെന്ററായി ബ്ലാക്ക്ക്യാപ്സിനായി തന്റെ സാന്നിദ്ധ്യം അറിയിക്കും.
അതേസമയം, ഒരു കളിക്കാരനെന്ന നിലയില്‍ വില്യംസണിന്റെ ലോകകപ്പ് പങ്കാളിത്തം ഇതുവരെ ന്യൂസിലന്‍ഡ് ഹെഡ് കോച്ച് ഗാരി സ്റ്റെഡ് തള്ളിക്കളഞ്ഞിട്ടില്ല. ഐപിഎല്ലിലെ ആദ്യ മത്സരത്തിനിടെ വലത് കാല്‍മുട്ടില്‍ മുന്‍ഭാഗത്തെ ക്രൂസിയേറ്റ് ലിഗമെന്റ് പൊട്ടിയതിനെ തുടര്‍ന്ന് വില്യംസണ്‍ ക്രച്ചസിലാണ് ഇന്ത്യയില്‍ നിന്ന് മടങ്ങിയത്. പിന്നീട് ശസ്ത്രക്രിയ വിജയകരമായി നടത്തി.
ഇന്ത്യ ആതിഥേയത്വം വഹിക്കുന്ന 2023 ഏകദിന ലോകകപ്പ് ഒക്ടോബര്‍ 5 മുതല്‍ നവംബര്‍ 19 വരെയാകും നടക്കുക എന്നാണ് റിപ്പോര്‍ട്ടുകള്‍. 10 ടീമുകള്‍ പങ്കെടുക്കുന്ന ലോകകപ്പിന്റെ ഫൈനല്‍ പോരാട്ടം അഹമ്മദാബാദിലെ നരേന്ദ്ര മോദി സ്റ്റേഡിയത്തിലാകും നടക്കുക.
ബിസിസിഐ ഇതിനായി 12 വേദികളുടെ ചുരുക്കപ്പട്ടികയാണു തയാറാക്കിയിരിക്കുന്നത്. 46 ദിവസത്തെ ലോകകപ്പില്‍ 48 മത്സരങ്ങളാണുള്ളത്. അഹമ്മദാബാദിനു പുറമേ ബെംഗളൂരു, ചെന്നൈ, ഡല്‍ഹി, ധര്‍മശാല, ഗുവാഹത്തി, ഹൈദരാബാദ്, കൊല്‍ക്കത്ത, ലഖ്‌നൗ, ഇന്‍ഡോര്‍, രാജ്‌കോട്ട്, മുംബൈ എന്നിവയാണു മറ്റു വേദികള്‍.