കളിക്കളത്തില്‍ ബാറ്റ് കൊണ്ട് വിസ്മയിപ്പിക്കുന്ന താരമാണ് ഋഷഭ് പന്ത്. കളിക്കളത്തില്‍ മാത്രമല്ല പുറത്തും അദ്ദേഹം നല്ലൊരു മനുഷ്യനാണ് എന്ന് പലതവണ തെളിയിച്ചിട്ടുണ്ട്. അദ്ദേഹത്തിനെ സ്‌നേഹിക്കുന്ന കേരളത്തിലെ ഒരു കൂട്ടം ചെറുപ്പക്കാരും ഒട്ടും പുറകിലല്ല എന്ന് തെളിയിക്കുകയാണ്. താരത്തിന്റെ ജന്മദിനം അനേകം പേരുടെ വിശപ്പകറ്റിയാണ് അവര്‍ ആഘോഷിച്ചത്.
കഴിഞ്ഞ 4 വര്‍ഷമായി മുടങ്ങാതെ ചെയ്തു വരുന്ന ഈ പ്രവര്‍ത്തി ഇത്തവണയും അവര്‍ മുടക്കിയില്ല. കരുനാഗപ്പള്ളി നെഞ്ചുരോഗശുപത്രിയില്‍ നന്മവണ്ടി എന്ന സംഘടനായുടെ സഹായത്തോടെ അവര്‍ പ്രഭാത ഭക്ഷണം വിതരണം ചെയ്തും തിരുവനന്തപുരം വേങ്ങനൂരിലെ അഭയകേന്ദ്രത്തില്‍ ഉച്ചഭക്ഷണവും മധുരവും നല്‍കുകയും ചെയ്തു.
ഇതിനുപുറമേ എല്ലാ തവണത്തെ പോലെയും ഡല്‍ഹി കേന്ദ്രമാക്കി പ്രവര്‍ത്തിക്കുന്ന താഗം ഫൗണ്ടേഷന്‍ വഴി അനേകം പേരുടെ വിശപ്പകറ്റാനും അവര്‍ മറന്നില്ല. 15 കാര്യകാര്‍ ഉള്‍പ്പെടെ 100 ല്‍ അധികം അംഗങ്ങളാണ് ഈ സംഘടനയിലുള്ളത്.
ഇന്ത്യന്‍ വിക്കറ്റ് കീപ്പര്‍-ബാറ്ററായ ഋഷഭ് പന്ത് കഴിഞ്ഞ വെള്ളിയാഴ്ചയാണ് (ഒക്ടോബര് 4) തന്റെ 27ാം ജന്മദിനം ആഘോഷിച്ചത്.