ലീഡ്‌സില്‍ ഇന്നിംഗ്‌സ് തോല്‍വി ഏറ്റുവാങ്ങിയ വിരാട് കോഹ്‌ലിയേയും സംഘത്തെയും രക്ഷിക്കാന്‍ സ്റ്റുവര്‍ട്ട് ബിന്നിയോ? കഴിഞ്ഞ ദിവസം ഇന്‍സ്റ്റഗ്രാം സ്റ്റോറിയില്‍ ബിന്നിയുടെ ഭാര്യയും അവതാരകയുമായ മായന്ദി ലാംഗര്‍ പോസ്റ്റ് ചെയ്‌തൊരു ചിത്രമാണ് ക്രിക്കറ്റ് ആരാധകര്‍ക്കിടയില്‍ ചര്‍ച്ചയായിരിക്കുന്നത്.
തലയില്‍ കൈവച്ചുനില്‍ക്കുന്ന ജയിംസ് ആന്‍ഡേഴ്‌സനു മുന്നിലൂടെ റണ്ണിനായി ഓടുന്ന ബിന്നിയുടെ ചിത്രമാണ് മായന്ദി പോസ്റ്റ് ചെയ്തത്. 2014ല്‍ ഇംഗ്ലണ്ടില്‍ പര്യടനം നടത്തിയ ഇന്ത്യന്‍ ടീമിനായി ബിന്നി മികച്ച പ്രകടനം പുറത്തെടുത്ത ഇന്നിംഗ്‌സില്‍ നിന്നുള്ളതാണ് ഈ ചിത്രം. അന്നത്തെ അരങ്ങേറ്റത്തില്‍ മത്സരത്തില്‍ ബിന്നി 78 റണ്‍സ് നേടിയിരുന്നു. ലീഡ്‌സില്‍ ഒന്നാം ഇന്നിംഗ്‌സില്‍ ഇന്ത്യ ഓള്‍ഔട്ടായത് ഇതേ സ്‌കോറിനാണ്.
ജയിംസ് ആന്‍ഡേഴ്‌സന്റെ നേതൃത്വത്തില്‍ ഇംഗ്ലിഷ് ബോളര്‍മാര്‍ എറിഞ്ഞു തകര്‍ത്ത ഇന്ത്യയെ രക്ഷിക്കാന്‍ ഇനി ബിന്നിക്ക് കഴിയുമെന്ന സൂചനയാണ് മായന്ദി നല്‍കുന്നതെന്നാണ് ഒരു വിഭാഗം ആരാധകരുടെ കണ്ടെത്തല്‍. ഇന്ത്യയ്്ക്കായി ആറ് ടെസ്റ്റുകള്‍ കളിച്ചിട്ടുള്ള ബിന്നി 10 ഇന്നിംഗ്‌സുകളില്‍നിന്ന് 21.55 ശരാശരിയില്‍ 194 റണ്‍സാണ് നേടിയിട്ടുള്ളത്.