സ്വന്തം മണ്ണില്‍ ഇന്ത്യയുടെ യുവനിരയോട് തോറ്റത്തിന്റെ നാണക്കേട് ഓസീസിനെ ഇപ്പോഴും വിട്ടുമാറിയിട്ടില്ല. പ്രധാന താരങ്ങളൊന്നും ഇല്ലായിരുന്നിട്ടും ഇന്ത്യന്‍ യുവനിര ഓസീസ് വമ്പിനെ നിഷ്‌കരണം തച്ചുടക്കുകയായിരുന്നു. ഇന്ത്യയുടെ മൂന്നാം ഇലവനോടാണ് ഓസീസ് തോറ്റതെന്നായിരുന്നു ഇംഗ്ലണ്ട് മുന്‍ നായകന്‍ മൈക്കല്‍ വോണിന്റെ പരിഹാസം. ഇപ്പോള്‍ ഇതിന് മറുപടിയുമായി രംഗത്ത് വന്നിരിക്കുകയാണ് ഓസീസ് കോച്ച് ജസ്റ്റിന്‍ ലാംഗര്‍.
“വോണ്‍ തമാശയായിട്ട് പറഞ്ഞതാണെന്ന എനിക്കറിയാം. എന്നാല്‍ വോണ്‍ ഇത്തരത്തില്‍ ഇന്ത്യയെക്കുറിച്ച് രണ്ടാം നിരയെന്നോ മൂന്നാം നിരയെന്നോ ഒക്കെ പറയുമെങ്കിലും ക്രിക്കറ്റിനെ അത്രമേല്‍ ഇഷ്ടപ്പെടുന്ന ഒരു രാജ്യത്തെ ഒന്നര ബില്യണ്‍ ആളുകളില്‍ നിന്ന് അവസാന ഇലവനില്‍ ഇടം പിടിക്കണമെങ്കില്‍ അവര്‍ അത്രയും മികച്ച കളിക്കാരായിരിക്കണമെന്ന് ഊഹിക്കാവുന്നതേയുള്ളു.”
“ഒരു പറ്റം മികച്ച പ്രതിഭയുള്ള താരങ്ങളെയാണ് ഞങ്ങളന്ന് ഗ്രൗണ്ടില്‍ കണ്ടത്. അവര്‍ അവരുടെ അവസരങ്ങള്‍ മുതലാക്കുവാനായി തീവ്രതയോടെയാണ് മത്സരത്തെ സമീപിച്ചത്. നിര്‍ഭാഗ്യവശാല്‍ ഞങ്ങളായിരുന്നു എതിര്‍ഭാഗത്ത്” ലാംഗര്‍ പറഞ്ഞു.
2-1 നാണ് ഇന്ത്യ പരമ്പര സ്വന്തമാക്കിയത്. ഓസ്‌ട്രേലിയന്‍ മണ്ണിലെ ഇന്ത്യയുടെ തുടര്‍ച്ചയായ രണ്ടാം പരമ്പര വിജയമാണിത്. ജയത്തോടെ ബോര്‍ഡര്‍-ഗാവസ്‌കര്‍ ട്രോഫി ഇന്ത്യ നിലനിര്‍ത്തുകയും ചെയ്തു.