2024 ലെ ഐസിസി ടി20 ലോകകപ്പിൽ വിരാട് കോഹ്‌ലി ടീം ഇന്ത്യയ്‌ക്കായി ഇന്നിംഗ്സ് ഓപ്പൺ ചെയ്യും. ജൂൺ 5 ന് ന്യൂയോർക്കിൽ നടക്കുന്ന ആദ്യ പോരാട്ടത്തിൽ ഇന്ത്യ അയർലൻഡിനെ നേരിടും. ഇന്ത്യയും ബംഗ്ലാദേശും തമ്മിലുള്ള സന്നാഹ മത്സരത്തിനിടെ ന്യൂ യോർക്കിലെ പിച്ചിൽ ബൗൺസ് വളരെയധികം ഉണ്ടായിരുന്നു.
ട്രാക്കിൽ ഇന്ത്യൻ ഓപ്പണർമാർ ശരിക്കും ബുദ്ധിമുട്ടുന്ന കാഴ്ചക്കാണ് നമ്മൾ സാക്ഷ്യം വഹിച്ചത്. റിഷഭ് പന്തും ഹാർദിക് പാണ്ഡ്യയും മാത്രമാണ് ബംഗ്ലാദേശ് ബോളർമാരെ നല്ല രീതിയിൽ നേരിട്ടത്. അർഷ്ദീപ് സിംഗ്, ശിവം ദുബെ എന്നിവർ രണ്ട് വിക്കറ്റ് വീതം വീഴ്ത്തിയപ്പോൾ രോഹിത് ശർമ്മയുടെ ടീം എതിരാളികളെ 60 റൺസിന് പരാജയപ്പെടുത്തി. ഇന്ത്യൻ പ്രീമിയർ ലീഗിന് ശേഷം വിശ്രമത്തിലായിരുന്ന കോഹ്‌ലി ടീമിനൊപ്പം ചേർന്നിട്ടുണ്ട് .
ആദ്യ മത്സരത്തിൽ വിരാടിൻ്റെ റോൾ നിർണായകമാകുമെന്ന് മുൻ ഇന്ത്യൻ താരം മുഹമ്മദ് കൈഫ് പറഞ്ഞു. “സന്നാഹ മത്സരത്തിൽ എന്താണ് സംഭവിച്ചതെന്ന് ഞങ്ങൾ കണ്ടു. സ്‌പോഞ്ചി ബൗൺസ് ഉള്ളതിനാൽ പിച്ച് ബാറ്റിംഗിന് അനുയോജ്യമല്ലായിരുന്നു. അയർലൻഡിനെതിരായ മത്സരത്തിലും സമാനമായ പ്രതലം ഞാൻ പ്രതീക്ഷിക്കുന്നു.
“പവർപ്ലേ ഓവറുകളിൽ സ്ട്രോക്ക് കളിക്കാൻ ഇഷ്ടപ്പെടുന്ന വിരാട് ഇന്നിംഗ്സ് ഓപ്പൺ ചെയ്യും. ഫീൽഡ് നിയന്ത്രണങ്ങൾ നീക്കിയ ശേഷം അദ്ദേഹത്തിൻ്റെ പങ്ക് പ്രാധാന്യമർഹിക്കും. വിക്കറ്റുകൾക്കിടയിൽ കോഹ്‌ലിയുടെ ഓട്ടം ഇന്ത്യക്ക് അനുകൂലമാകും, കാരണം എതിരാളികളെ സമ്മർദ്ദത്തിലാക്കും അവൻ ”മുഹമ്മദ് കൈഫ് സ്റ്റാർ സ്‌പോർട്‌സിൽ പറഞ്ഞു.