മുംബൈ ബാറ്ററും ഇന്ത്യന്‍ ദേശീയ ക്രിക്കറ്റ് താരം സര്‍ഫറാസ് ഖാന്റെ സഹോദരനുമായ മുഷീര്‍ ഖാന് ഉത്തര്‍പ്രദേശിലുണ്ടായ വാഹനാപകടത്തില്‍ പരിക്ക്. കാണ്‍പൂരില്‍ നിന്ന് ലഖ്നൗവിലേക്ക് ഇറാനി കപ്പില്‍ പങ്കെടുക്കാന്‍ പോകുമ്പോഴാണ് അപകടമുണ്ടായത്. സംഭവത്തില്‍ മുഷീറിന്റെ കൈയ്ക്ക് പൊട്ടലുണ്ടായെന്നാണ് വിവരം. കൂടുതല്‍ വിവരങ്ങള്‍ ലഭ്യമായിട്ടില്ല.
മുംബൈയില്‍ നിന്ന് ടീമിനൊപ്പമായിരുന്നില്ല മുഷീര്‍ ലഖ്നൗവിലേക്ക് പോയത്. അസംഗഡില്‍ നിന്ന് പിതാവും കോച്ചുമായ നൗഷാദ് ഖാനൊപ്പമായിരുന്നു മുഷീര്‍ ലഖ്നൗവിലേക്ക് പോയത്.
പരിക്കേറ്റതിനാല്‍ മുഷീര്‍ ഖാന് ഒക്ടോബര്‍ ഒന്നിന് ആരംഭിക്കുന്ന ഇറാനി കപ്പ് മത്സരം നഷ്ടമാവും. റെസ്റ്റ് ഓഫ് ഇന്ത്യക്കെതിരായ ഇറാനി ട്രോഫിയില്‍ മുംബൈക്കായാണ് 19കാരനായ മുഷീര്‍ കളിക്കുന്നത്. സെന്‍സേഷണല്‍ ഫോമിലായിരുന്നതിനാല്‍ മുഷീറിന്റെ അഭാവം മുംബൈയ്ക്ക് വലിയ തിരിച്ചടിയാണ്.
ഒമ്പത് ഫസ്റ്റ് ക്ലാസ് മത്സരങ്ങളില്‍നിന്ന് താരം 51.14 ശരാശരിയില്‍ മൂന്ന് സെഞ്ചുറികളും ഒരു അര്‍ധസെഞ്ചുറിയും ഉള്‍പ്പെടെ 716 റണ്‍സ് നേടിയിട്ടുണ്ട്. എട്ട് വിക്കറ്റും വീഴ്ത്തിയിട്ടുണ്ട്. ബെംഗളൂരുവില്‍ ഇന്ത്യ എക്കെതിരെ ഇന്ത്യ ബിക്ക് വേണ്ടി ദുലീപ് ട്രോഫി അരങ്ങേറ്റത്തില്‍ മുഷീര്‍ 181 റണ്‍സ് നേടിയിരുന്നു.