ശ്രേയസ്സ് അയ്യർ തിളങ്ങാത്തത് ഇന്ത്യൻ ബാട്ടിങ്ങിനെ കാര്യമായി ബാധിക്കുന്നുണ്ടെന്ന് പറയുകയാണ് ഇർഫാൻ പത്താൻ. കാരണം നല്ല പേസുള്ള ബൗളർമാർക്കെതിരെ ശ്രേയസ് നല്ല രീതിയിൽ ബുദ്ധിമുട്ടുന്നതിനാൽ ലോകകപ്പിൽ ഉൾപ്പടെ താരത്തിന്റെ സ്ഥാനത്തിന് ഭീക്ഷണിയുണ്ടെന്നും ഇർഫാൻ പറയുന്നു.
ഈ വർഷം ഫെബ്രുവരിയിൽ ശ്രീലങ്കയ്‌ക്കെതിരായ മൂന്ന് മത്സരങ്ങളുടെ ടി20 ഐ പരമ്പരയിൽ ഇന്ത്യക്കായി ശ്രേയസ് മികച്ച ഫോമിലായിരുന്നു. മൂന്ന് അർധസെഞ്ചുറികൾ അടിച്ചുകൂട്ടിയ അദ്ദേഹം മൂന്ന് മത്സരങ്ങളിലും പുറത്താകാതെ 204 റൺസാണ് നേടിയത്.
എന്നിരുന്നാലും, പേസ് ബൗളിംഗിനെതിരായ അദ്ദേഹത്തിന്റെ ബുദ്ധിമുട്ടുകൾ ഐ.പി.എലിലും കാണാമായിരുന്നു. ദക്ഷിണാഫ്രിക്കയ്‌ക്കെതിരെ നടന്നുകൊണ്ടിരിക്കുന്ന ടി20യിലും അദ്ദേഹത്തിന് കാര്യമായ സ്വാധീനം ചെലുത്താൻ കഴിഞ്ഞില്ല. സ്റ്റാർ സ്‌പോർട്‌സിൽ സംസാരിച്ച പത്താൻ, ഫാസ്റ്റ് ബൗളിംഗിനെതിരെ 27-കാരൻ തന്റെ കഴിവുകൾ വർദ്ധിപ്പിക്കേണ്ടതുണ്ടെന്ന് സമ്മതിച്ചു. അദ്ദേഹം പ്രസ്താവിച്ചു:
“അതെ വ്യക്തമായും, ഈ പരമ്പരയിൽ മാത്രമല്ല, കുറച്ച് മത്സരങ്ങളിൽ (അതിനുമുമ്പ്) പേസിനെതിരെ അദ്ദേഹം ബുദ്ധിമുട്ടുന്നുണ്ട്. ഐപിഎല്ലിൽ പോലും 140-ന് മുകളിൽ പന്തെറിയുന്ന ഫാസ്റ്റ് ബൗളർമാരുടെ കാര്യത്തിൽ അദ്ദേഹം അൽപ്പം ബുദ്ധിമുട്ടുന്നത് നമ്മൾ കണ്ടതാണ്. അദ്ദേഹത്തിന്റെ സ്ട്രൈക്ക് റേറ്റും കുറഞ്ഞു.”
സ്പിന്നിനെതിരെയും മീഡിയം പേസിനെതിരെയും ശ്രേയസ് നന്നായി കളിക്കുമെങ്കിലും യഥാർത്ഥ ഫാസ്റ്റ് ബൗളിംഗിനെതിരെ അദ്ദേഹം ബുദ്ധിമുട്ടുന്നു, പത്താൻ നിരീക്ഷിച്ചു. അദ്ദേഹം കൂട്ടിച്ചേർത്തു:
“അവൻ സ്പിന്നർമാർക്കെതിരെ കളിക്കാൻ ഇഷ്ടപ്പെടുന്നു, മണിക്കൂറിൽ 140 കിലോമീറ്ററിൽ താഴെ വേഗത്തിൽ പന്തെറിയുന്ന താരങ്ങൾക്ക് എതിരെയും ശ്രേയസ് മികച്ച രീതിയിലാണ് കളിച്ചത്. എന്നാൽ അവൻ മെച്ചപ്പെടുത്തേണ്ട കളിയുടെ ഒരു മേഖല ഫാസ്റ്റ് ബൗളർമാരെ നേരിടാനാണ്.”
ഇന്നത്തെ മത്സരത്തിൽ താരത്തിൽ നിന്നും മികച്ച പ്രകടനമായിരിക്കും ടീം മാനേജ്‌മന്റ് പ്രതീക്ഷിക്കുന്നത്.