തമിഴില്‍ എഴുതിയ വിവാഹ ക്ഷണക്കത്ത് സമൂഹ മാധ്യമങ്ങളില്‍ വൈറലായി മാറിയതില്‍ ഓസ്ട്രേലിയന്‍ ബാറ്റ്‌സ്മാന്‍ ഗ്‌ളെന്‍ മാക്‌സ്‌വെല്ലിന് കലിപ്പ്. ക്ഷണക്കത്ത് ഇന്ത്യയിലെ സമൂഹ മാധ്യമങ്ങളില്‍ വ്യാപകമായി പ്രചരിച്ചത് ഞെട്ടിച്ചതായി താരം പറഞ്ഞു. മാക്സ്വെല് തമിഴ് പെണ്‍കൊടി വിനി രാമന് അടുത്ത മാസമാണ് താലികെട്ടുന്നത്. ഇവരുടെ തമിഴില്‍ തയ്യാറാക്കിയ ക്ഷണക്കത്ത് സമൂഹ മാധ്യമങ്ങളില്‍ വൈറലായി മാറിയിരുന്നു. സ്വകാര്യചടങ്ങായി ഇതിനെ കാണാനായിരുന്നു താരത്തിന് താത്പര്യം
ഇന്ത്യയിലെ ബന്ധുക്കളുടെ ആവേശവും ആകാംക്ഷയുമാണ് ക്ഷണക്കത്ത് ചോരാന്‍ ഇടയാക്കിയതെന്ന് മാക്സ്വെല് പറഞ്ഞു. ക്ഷണക്കത്ത് ചോര്‍ന്നതും സമൂഹ മാധ്യമങ്ങളില്‍ പ്രചരിച്ചതും ശരിയായില്ലെന്നും മാക്സ്വെല് അഭിപ്രായപ്പെട്ടു. തീര്‍ത്തും രഹസ്യമായി നടത്താന്‍ നിശ്ചയിച്ചിരുന്ന വിവാഹചടങ്ങുകളുടെ വിശദാംശങ്ങള്‍ പരസ്യമായ സാഹചര്യത്തില്‍, ചടങ്ങുകളുടെ സുരക്ഷ വര്‍ദ്ധിപ്പിക്കുമെന്ന് മാക്സ്വെല് വ്യക്തമാക്കി. മെല്‍ബണില്‍ ജനിച്ചു വളര്‍ന്ന വിനി ചെന്നൈ വെസ്റ്റ് മാമ്പലം സ്വദേശിയാണ്.
വിനി ജനിച്ചത് ഓസ്‌ട്രേലിയയില്‍ ആണെങ്കിലും മാതാപിതാക്കള്‍ തമിഴ് പാരമ്പര്യം തുടരുന്നവരാണ്. മാര്‍ച്ച് 27നു തമിഴ് ആചാര പ്രകാരമാണു വിവാഹവും. 2017 മുതല്‍ പ്രണയത്തിലായ ഇരുവരും കഴിഞ്ഞ വര്‍ഷം ഇന്ത്യന്‍ ആചാരപ്രകാരം വിവാഹനിശ്ചയം നടത്തിയിരുന്നു. എന്നാല്‍, കോവിഡ് വ്യാപനത്തെ തുടര്‍ന്നു വിവാഹം നടത്താനായിരുന്നില്ല. തമിഴില്‍ അച്ചടിച്ച വിവാഹക്ഷണക്കത്തു പരമ്പരാഗത മഞ്ഞ നിറത്തിലാണു പുറത്തിറക്കിയത്. ഇതു സമൂഹ മാധ്യമങ്ങളില്‍ വൈറലായിരുന്നു.