ഒന്നോ രണ്ടോ കളി മോശമായതിന്റെ പേരില്‍ ആരും പുറത്തിരിക്കേണ്ടി വരില്ലെന്ന് ഇന്ത്യന്‍ നായകന്‍ രോഹിത് ശര്‍മ്മ. അര്‍ഹിക്കുന്നവര്‍ ഉണ്ടെങ്കില്‍ എന്തായാലും അവരെത്തേടി വിളി വരുമെന്നും അവസരം കിട്ടുന്നവര്‍ അത് മുതലാക്കുമ്പോള്‍ ടീമിന് കൂടുതല്‍ കരുത്തരാകുമെന്നും പറഞ്ഞു. കഴിഞ്ഞ ഒമ്പത് മത്സരങ്ങളില്‍ മിക്കവാറും എല്ലാവര്‍ക്കും അവസരം കിട്ടിയെന്നും തങ്ങള്‍ ആഗ്രഹിച്ചതാണ് അതെന്നും പറഞ്ഞു.
ശ്രീലങ്കക്കെതിരായ പരമ്പര തൂത്തുവാരിയതിന് പിന്നാലെയാണ് ഇന്ത്യന്‍ ടീമിലെ യുവതാരങ്ങള്‍ക്ക് ആത്മവിശ്വാസം പകര്‍ന്ന് നായകന്‍ എത്തിയത്. മുമ്പോട്ടുള്ള കുതിപ്പാണ് ലക്ഷ്യം. ടീമിലെ സ്ഥാനത്തെക്കുറിച്ച് ആരും ആകുലപ്പെടേണ്ട സാഹചര്യമില്ല. അര്‍ഹതയുളളവര്‍ ആരായാലും അവരെത്തേടി അവസരം വരും. അതെത്തുക തന്നെ ചെയ്യുമെന്നും താരം പറഞ്ഞു. ക്യാപ്റ്റനായുള്ള രോഹിതിന്റെ മൂന്നാമത്തെ ടി20 വൈറ്റ് വാഷ് കൂടിയായിരുന്നു ഇന്നലത്തെ വിജയം.
ഈ പരമ്പരയില്‍ ഒരുപാട് പോസിറ്റീവായ കാര്യങ്ങള്‍ സംഭവിച്ചു. എല്ലാ ഘടകങ്ങളും ഒരുമിച്ചുവന്നു. ടീമിലെ സ്ഥാനത്തെക്കുറിച്ചോര്‍ത്ത് ആശങ്കപ്പെടേണ്ട. എല്ലാ വിടവുകളും നികത്തിയാകും നമ്മള്‍ മുമ്പോട്ടുപോകുന്നതെന്നും പറഞ്ഞു. ക്യാപ്റ്റനെന്ന നിലയില്‍ രോഹിത് ശര്‍മ നാട്ടില്‍ നേടുന്ന 17ാം ടി20 ജയമാണിത്. ഇതും റെക്കോര്‍ഡാണ്,
ഇംഗ്ലണ്ടിന്റെ ഓയിന്‍ മോര്‍ഗനെയും ന്യൂസീലന്‍ഡിന്റെ കെയ്ന്‍ വില്യംസണെയുമാണ് രോഹിത് പിന്നിലാക്കിയത്. മോര്‍ഗനും വില്യംസനും കീഴില്‍ 15 തവണയാണ് ടീമുകള്‍ക്ക് അവരുടെ നാട്ടില്‍ ജയിക്കാനായത്. തുടര്‍ച്ചയായി 12 ടി 20 മത്സരങ്ങള്‍ വിജയിക്കുന്ന രണ്ടാമത്തെ ടീമാണ് ഇന്ത്യ.