നിലവില്‍ നടന്നു കൊണ്ടിരിക്കുന്ന ഏകദിന ലോകകപ്പിലെ ഫൈനലിസ്റ്റുകളെയും ജേതാക്കളെയും പ്രവചിച്ച് ഓസീസ് താരം നഥാന്‍ ലിയോണ്‍. ഫൈനലില്‍ അതിഥേയരായ ഇന്ത്യയുടെ ഓസ്ട്രേലിയയും ഏറ്റുമുട്ടുമെന്നും ഇന്ത്യയെ പരാജയപ്പെടുത്തി ഓസീസ് തങ്ങളുടെ ആറാം കിരീടത്തില്‍ മുത്തമിടുമെന്നും ലിയോണ്‍ പ്രവചിച്ചു.
ഓസ്ട്രേലിയയും ഇന്ത്യയും തമ്മിലായിരിക്കും ഫൈനലെന്നു ഞാന്‍ സത്യസന്ധമായും വിശ്വസിക്കുന്നു. എന്നെ സംബന്ധിച്ച് നമ്പര്‍ വണ്‍ ഫേവറിറ്റ് ഇന്ത്യയാണ്. എന്നാല്‍ രാജ്യത്തിന്റെ മുഴുവന്‍ സമ്മര്‍ദ്ദവും ഇന്ത്യക്കുണ്ട്.
ഇന്ത്യ കിരീടം നേടുമെന്ന് അവരെല്ലാം പ്രതീക്ഷിക്കുകയും ആഗ്രഹിക്കുകയും ചെയ്യുന്നു. ഫൈനലില്‍ ഇന്ത്യക്കെതിരേ ഓസ്ട്രേലിയ മികച്ച സ്‌കോര്‍ പടുത്തുയര്‍ത്തിയ ശേഷം അതു പ്രതിരോധിച്ച് വീണ്ടുമൊരു ലോക കിരീടം സ്വന്തമാക്കുമെന്നു പ്രതീക്ഷിക്കുന്നു- ലിയോണ്‍ പറഞ്ഞു.
ടൂര്‍ണമെന്റില്‍ ഓസ്‌ട്രേലിയയെ പരാജയപ്പെടുത്തിയാണ് ഇന്ത്യ വിജയതേരോട്ടം തുടങ്ങിയത്. എന്നാല്‍ ഓസീസിന്റെ തുടക്കം തകര്‍ച്ചയോടെയയാിരുന്നു. ആദ്യ രണ്ട് മത്സരങ്ങളും തോറ്റ ഓസീസ് പിന്നീടു കളിച്ച് നാല് മത്സരങ്ങളും ജയിച്ചാണ് സെമി സാധ്യത നിലനിര്‍ത്തിയിട്ടുള്ളത്.