അഫ്ഗാനിസ്ഥാന്‍ ടീമിനൊപ്പം സമയം ചെലവഴിക്കാന്‍ വാങ്കഡെയില്‍ അപ്രതീക്ഷിത സന്ദര്‍ശനം നടത്തി ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍. ഏകദിന ലോകകപ്പില്‍ അടുത്ത മത്സരത്തിനായി അഫ്ഗാന് ടീം മുംബൈയില്‍ എത്തിയപ്പോഴായിരുന്നു സച്ചിന്റെ അപ്രതീക്ഷിത സന്ദര്‍ശനം. പാറ്റ് കമ്മിന്‍സ് നയിക്കുന്ന ഓസ്ട്രേലിയയാണ് അഫ്ഗാനിസ്ഥാന്റെ എതിരാളികള്‍.
സെമി സീറ്റ് ഉറപ്പിക്കാന്‍ ഇരുടീമിനും ജയം അനിവാര്യമാണ്. ഇന്ന് അഫ്ഗാനിസ്ഥാനെതിരായ മത്സരം വിജയിച്ചാല്‍ ഓസ്‌ട്രേലിയക്ക് സെമി ഉറപ്പിക്കാം. ഓസ്‌ട്രേലിയയെ അട്ടിമറിക്കാനായാല്‍ അഫ്ഗാനിസ്ഥാന്‍ ന്യൂസിലന്‍ഡിനെ മറികടന്ന് നാലാം സ്ഥാനത്തും എത്തും.
ആദ്യ രണ്ട് മത്സരങ്ങളിലെ പരാജയത്തില്‍ നിന്ന് പൂര്‍വാധികം ശക്തിയോടെ തിരിച്ചുവന്ന ഓസീസ് തുടരെ അഞ്ച് മത്സരങ്ങള്‍ വിജയിച്ചുകഴിഞ്ഞു. മറുവശത്ത് ഒരു സ്വപ്‌ന കുതിപ്പിലാണ് അഫ്ഗാനിസ്ഥാന്‍. ഇംഗ്ലണ്ട്, പാകിസ്ഥാന്‍, ശ്രീലങ്ക എന്നീ മുന്‍ ചാമ്പ്യന്മാരെ വീഴ്ത്താനായതിന്റെ അത്മവിശ്വസത്തിലാണ് അഫ്ഗാന്.
മുംബൈ വാംഖഡെ സ്റ്റേഡിയത്തില്‍ ഉച്ചകഴിഞ്ഞ് 2 മണിക്കാണ് മത്സരം. ഇതിനകം ഇന്ത്യയും ദക്ഷിണാഫ്രിക്കയുമാണ് സെമിയില്‍ പ്രവേശിച്ച ടീമുകള്‍.