ടെസ്റ്റ് ക്രിക്കറ്റില്‍ കാട്ടിയ സ്ഥിരതയാണ് ലോര്‍ഡ്‌സിലെ ഇന്ത്യയുടെ വിജയത്തിന് ആധാരമെന്ന് പാകിസ്ഥാന്‍ ബാറ്റിംഗ് ഇതിഹാസം ഇന്‍സമാം ഉല്‍ ഹക്ക്. ഇന്ത്യന്‍ വാലറ്റത്തിന്റെ പ്രകടനത്തെയും ഇന്‍സി പ്രത്യേകം എടുത്തുപറഞ്ഞു.
ലോര്‍ഡ്‌സില്‍ അര്‍ഹിച്ച ജയമാണ് ഇന്ത്യ നേടിയത്. നോട്ടിങ്ഹാം ടെസ്റ്റ് മുതല്‍ ഇന്ത്യ സ്ഥിരതകാട്ടി. ആദ്യ മത്സരത്തില്‍ഇന്ത്യ നന്നായി ബൗള്‍ ചെയ്തു. ലോര്‍ഡ്‌സിലും അവര്‍ ഒരവസരവും പാഴാക്കിയില്ല. നോട്ടിങ്ഹാമില്‍ ഇന്ത്യക്ക് കൈയെത്തുംദൂരത്ത് വിജയം നഷ്ടമായി. അതിനു കിട്ടിയ പ്രതിഫലമാണ് ലോര്‍ഡ്‌സിലെ ജയമെന്നും ഇന്‍സമാം പറഞ്ഞു.
ചില ടെസ്റ്റുകള്‍ നിങ്ങള്‍ തോല്‍ക്കും ചിലത് ജയിക്കും. എന്നാല്‍ ഇന്ത്യയുടെ കാര്യത്തില്‍ എന്നെ ഏറെ ആകര്‍ഷിച്ചത് സമീപനവും ആക്രമണോത്സുകതയുമാണ്. അതാണ് പ്രധാനപ്പെട്ട കാര്യം. വാലറ്റത്തിന്റെ ബാറ്റിംഗ് മികവിനെ അടിസ്ഥാനമാക്കികൂടി വേണം ഒരു ടീമിന്റെ ശക്തിദൗര്‍ബല്യങ്ങള്‍ അളക്കാന്‍. അവര്‍ പൊരുതുമ്പോള്‍ ടീമിന്റെ ശക്തി നിങ്ങള്‍ തിരിച്ചറിയും. ഷമി അര്‍ദ്ധ ശതകം തികയ്ക്കുമ്പോള്‍ മുന്‍നിര ബാറ്റ്‌സ്മാന്‍മാരെല്ലാം പുറത്തായിരുന്നു. എന്നിട്ടും ഷമി പോരാട്ടം തുടര്‍ന്നു. ഷമി- ബുംറ സഖ്യമാണ് ഇംഗ്ലണ്ടിന്റെ തോല്‍വിയില്‍ നിര്‍ണായകമായതെന്നും ഇന്‍സമാം പറഞ്ഞു.