ഋഷഭ് പന്ത്- ഈ താരവും ഇന്ന് കളിച്ച മനോഹരമായ ഇന്നിംഗ്‌സും ഇന്ത്യൻ ആരാധകർ ഒരിക്കലും മറക്കാനിടയില്ല. സ്വന്തം മണ്ണിൽ സംഭവിക്കേണ്ട ഏറ്റവും വലിയ അപമാനത്തിൽ നിന്ന് താരം ഇന്ത്യയെ രക്ഷിക്കുക ആയിരുന്നു താരം. കിവീസ് ഉയർത്തിയ 146 എന്ന സ്കോറിന് മുന്നിൽ ബാറ്റ് ചെയ്ത ഇന്ത്യ 100 ൽ താഴെയുള്ള സ്കോറിന് പുറത്താക്കുമെന്ന് കരുതിയ സ്ഥലത്ത് നിന്ന് കളിയുടെ ഒരു വേള വിജയപ്രതീക്ഷ തന്നത് പന്ത് കളിച്ച മനോഹരമായ ഇന്നിങ്സ് ആയിരുന്നു.
സൂപ്പർതാരങ്ങളായ രോഹിതും, കോഹ്‌ലിയും, ഗില്ലും, സർഫ്രാസും, എല്ലാവരും കളി മറന്നപ്പോൾ ഇന്ത്യൻ ഇന്നിഗ്‌സിനെ മുന്നോട്ട് കൊണ്ടുപോയതും പുറത്താകുന്നത് വരെയും കിവീസിനെ വിറപ്പിച്ചതുമായ താരത്തിനെ വൺ മാൻ ഷോ അത്ര മനോഹരമായിരുന്നു. 57 പന്തിൽ 64 റൺ എടുത്ത ഏകദിന സ്റ്റൈലിൽ ഉള്ള ഇന്നിംഗ്സ് മാത്രമാണ് ഈ മൂന്നാം ടെസ്റ്റിൽ ഇന്ത്യക്ക് ഓർക്കാൻ ഉണ്ടായിരുന്നത്.
തന്റെ ടിപ്പിക്കൽ ശൈലിയിൽ തന്നെ കളിച്ചതിനൊപ്പം വളരെ ശ്രദ്ധയോടെ ഇന്നിംഗ്സ് കൊണ്ടുപോയി പന്ത് കിവീസിന്റെ മികച്ച ബോളർമാർക്ക് എല്ലാം ബുദ്ധിമുട്ട് സൃഷ്ടിച്ചു. ഒടുവിൽ വിവാദപരമായ ഒരു എൽബിഡബ്ല്യൂ തീരുമാനത്തിന് ഒടുവിൽ അജാസ് പട്ടേലിന് ഇരയായി മടങ്ങുമ്പോൾ മുംബൈ സ്റ്റേഡിയം മുഴുവൻ അയാളുടെ പോരാട്ടത്തിന് മുന്നിൽ കൈയടിച്ചു.
മത്സരത്തിലേക്ക് വന്നാൽ ന്യൂസിലാൻഡിനെതിരായ ടെസ്റ്റ് പരമ്പരയിലെ മൂന്നാമത്തെയും അവസാനത്തെയും മത്സരത്തിൽ ഇന്ത്യയ്ക്ക് 25 റൺസ് തോൽവി. 147 റൺസ് വിജയലക്ഷ്യവുമായി ഇറങ്ങിയ ഇന്ത്യ മൂന്നാം ദിനം 121 റൺസിന് ഓൾഔട്ടായി. ഇതോടെ പരമ്പര 3-0 ന് കിവീസ് തൂത്തുവാരി.