ഇംഗ്ലണ്ട് പര്യടനത്തിലെ ഉപേക്ഷിക്കപ്പെട്ട അഞ്ചാം ടെസ്റ്റിന്റെ കാര്യത്തില്‍ തനിക്ക് ഒന്നും അറിയില്ലെന്ന് ഇന്ത്യന്‍ ഓപ്പണര്‍ രോഹിത് ശര്‍മ്മ. പരമ്പര ഇന്ത്യ ജയിച്ചതായാണ് കരുതുന്നതെന്നും രോഹിത് പറഞ്ഞു. ഇന്ത്യന്‍ കോച്ച് രവി ശാസ്ത്രിക്കും അസിസ്റ്റന്റ് ഫിസിയോക്കും കോവിഡ് ബാധിച്ചതിനെ തുടര്‍ന്നാണ് മാഞ്ചസ്റ്ററിലെ അഞ്ചാം ടെസ്റ്റ് ഉപേക്ഷിച്ചത്.
ഇംഗ്ലണ്ടുമായുള്ള അഞ്ചാം ടെസ്റ്റിനെ കുറിച്ച് ഒരു പിടിയുമില്ല. ടെസ്റ്റിനെ ചുറ്റിപ്പറ്റി എന്താണ് സംഭവിക്കുന്നതെന്ന് അറിയില്ല. അടുത്ത വര്‍ഷം പരമ്പരയുടെ ഭാഗമാകാതെയുള്ള ഒരു ടെസ്റ്റാണോ നമ്മള്‍ കളിക്കുന്നത് ? പരമ്പര 2-1ന് നമ്മള്‍ ജയിച്ചതായാണ് ഞാന്‍ കരുതുന്നത്- രോഹിത് പറഞ്ഞു.
ടെസ്റ്റ് കരിയറിന്റെ അവസ്ഥ കണക്കിലെടുക്കുമ്പോള്‍, ഇംഗ്ലണ്ടിലെ എന്റെ പ്രകടനം മികച്ചതായിരുന്നു. എന്റെ ഏറ്റവും മികച്ച പരമ്പര ഇതല്ല. അതിനി വരാന്‍ ഇരിക്കുന്നതേയുള്ളൂ. ലോക ടെസ്റ്റ് ചാമ്പ്യന്‍ഷിപ്പ് ഫൈനലിന് മുന്‍പുള്ള സമയത്ത് ഏതു തരത്തിലെ സാങ്കേതിക വിദ്യയും മനോനിലയും സ്വീകരിക്കണമെന്ന കാര്യത്തിലാണ് സമയം ചെലവിട്ടത്. അക്കാര്യത്തില്‍ ഏറെ പുരോഗതി കൈവരിക്കാന്‍ കഴിഞ്ഞതില്‍ സന്തോഷമുണ്ടെന്നും രോഹിത് പറഞ്ഞു.