ലോക കപ്പിനുശേഷം ഇന്ത്യന്‍ ട്വന്റി20 ടീമിന്റെ ക്യാപ്റ്റന്‍ സ്ഥാനം ഒഴിയാനുള്ള തീരുമാനത്തില്‍ അധികം വിശദീകരണത്തിനില്ലെന്ന് വിരാട് കോഹ്ലി. ഇല്ലാത്ത കാര്യം കുത്തിപ്പൊക്കി വിവാദമുണ്ടാക്കുന്നവര്‍ക്ക് വളംവെച്ചുകൊടുക്കാന്‍ താനില്ലെന്ന് കോഹ്ലി പറഞ്ഞു.
എരിതീയില്‍ എണ്ണയൊഴിക്കാനില്ല. ക്യാപ്റ്റന്‍സി ഒഴിയാനുള്ള തീരുമാനം സംബന്ധിച്ച് ഏറെ വിശദീകരിച്ചുകഴിഞ്ഞു. ഒരേ കാര്യം തന്നെ വീണ്ടും വീണ്ടും പറയണമെന്ന് തോന്നുന്നില്ല- കോഹ്ലി വ്യക്തമാക്കി.ലോക കപ്പില്‍ നന്നായി കളിക്കുന്നതിലാണ് ശ്രദ്ധ. ടീമെന്ന നിലയില്‍ ചെയ്യേണ്ടത് ചെയ്യുന്നതിലാണ് മുഴുകുന്നത്. മറ്റുള്ളവര്‍ ഇല്ലാത്ത കാര്യങ്ങള്‍ ചൂഴ്ന്ന് കണ്ടെത്തും. അത്തരക്കാരെ പരിപോഷിക്കാന്‍ ഉദ്ദേശിക്കുന്നില്ലെന്നും കോഹ്ലി പറഞ്ഞു.
ലോക ടെസ്റ്റ് ചാമ്പ്യന്‍ഷിപ്പില്‍ ന്യൂസിലന്‍ഡിനോടേറ്റ തോല്‍വിക്കു പിന്നാലെ ടീമില്‍ ഉടലെടുത്ത അന്ത:ച്ഛിദ്രവും ബിസിസിഐയുമായുള്ള അഭിപ്രായഭിന്നതയുമാണ് നായകസ്ഥാനം ഉപേക്ഷിക്കാനുള്ള കോഹ്ലിയുടെ തീരുമാനത്തിലേക്ക് നയിച്ചതെന്ന് വാര്‍ത്തകളുണ്ടായിരുന്നു.