ടെസ്റ്റ് ഫോർമാറ്റുകളിൽ ഇന്ത്യയുടെ പ്രധാന തുറുപ്പ് ചീട്ടുകളിൽ ഒരാളാണ് രവീന്ദ്ര ജഡേജ. ക്യാപ്റ്റൻ രോഹിത്ത് ശർമ്മയുടെ വിശ്വസ്തനായ കളിക്കാരനും ജഡേജ തന്നെയാണ്. ടെസ്റ്റ് ഫോർമാറ്റിൽ 300 വിക്കറ്റുകൾ കരസ്ഥമാക്കുന്ന ലോകത്തിലെ ഏഴാമത്തെ താരം എന്ന റെക്കോഡ് ആണ് രവീന്ദ്ര ജഡേജ ഇന്നത്തെ മത്സരത്തിൽ സ്വന്തമാക്കിയിരിക്കുന്നത്. നേട്ടത്തെ കുറിച്ച് അദ്ദേഹം സംസാരിച്ചു.
രവീന്ദ്ര ജഡേജ പറയുന്നത് ഇങ്ങനെ:
” ഈ ഒരു നേട്ടം എനിക്ക് പ്രിയപ്പെട്ടതാണ്. ഞാൻ ടെസ്റ്റ് ക്രിക്കറ്റ് കളിക്കാൻ തുടങ്ങിയിട്ട് പത്ത് വർഷമായി, ഇപ്പോൾ എനിക്ക് ഇത് നേടാൻ സാധിച്ചതിൽ അഭിമാനം തോന്നുന്നു. എപ്പോഴൊക്കെ ഇന്ത്യൻ ജേർസി അണിയുന്നുവോ അപ്പോഴെല്ലാം എനിക്ക് സന്തോഷവും അഭിമാനവും ആണ് തോന്നുന്നത്. എന്റെ തുടക്ക കാലത്ത് ഞാൻ വൈറ്റ് ബോൾ ഫോർമാറ്റിലാണ് കളിക്കാൻ ആരംഭിച്ചത്. ഞാൻ ഒരു വൈറ്റ് ബോൾ സ്പെഷ്യലിസ്റ്റ് ആണെന്നാണ് പലരും പറഞ്ഞിരുന്നത്. ഞാൻ ഒരുപാട് കഷ്ടപ്പെട്ടു, അതിന്റെ ഫലമാണ് ഇപ്പോൾ നിൽക്കുന്ന ഈ ഞാൻ” രവീന്ദ്ര ജഡേജ പറഞ്ഞു.
ആദ്യ ടെസ്റ്റ് മത്സരത്തിൽ ഗംഭീര പ്രകടനം നടത്തിയത് പോലെ രണ്ടാമത്തെ ടെസ്റ്റിൽ അത് തുടരാൻ താരത്തിന് സാധിച്ചില്ല. റെക്കോഡ് നേടിയ ഒരു വിക്കറ്റ് മാത്രമാണ് അദ്ദേഹം സ്വന്തമാക്കിയത്. ബാറ്റിംഗിൽ 13 പന്തുകളിൽ 8 റൺസ് മാത്രമാണ് ജഡേജയ്ക്ക് നേടാനായത്.
നിലവിൽ ബംഗ്ലാദേശ് 26 റൺസ് നേടി രണ്ട് വിക്കറ്റുകൾ നഷ്ടമായി. ഇന്നത്തെ മത്സരത്തിൽ ഇന്ത്യ ആക്രമിച്ച് കളിക്കുന്ന രീതി ആണ് സ്വീകരിച്ചത്. അത് കൊണ്ട് തന്നെ പെട്ടന്ന് വിക്കറ്റുകൾ നഷ്ടമായി. നാളെയാണ് പരമ്പരയിലെ അവസാന ദിനം.