ഫെബ്രുവരിയിൽ ആരംഭിക്കാൻ പോകുന്ന ചാമ്പ്യൻസ് ട്രോഫിക്കായുള്ള ടീമിൽ മലയാളി താരമായ സഞ്ജു സാംസണ് അവസരം ലഭിച്ചിരുന്നില്ല. പകരമായി തിരഞ്ഞെടുത്തത് റിഷഭ് പന്തിനെയാണ്. ബിസിസിഐയുടെ നിർദേശ പ്രകാരം താരങ്ങൾ ആഭ്യന്തര ടൂർണമെന്റുകൾ കളിക്കണം എന്ന നിർദേശം ഉണ്ടായിരുന്നു. എന്നാൽ സഞ്ജു വിജയ് ഹസാരെ ട്രോഫിയിൽ നിന്ന് പിന്മാറിയിരുന്നു. കെസിഎ അദ്ദേഹത്തെ തഴഞ്ഞു എന്നാണ് റിപ്പോട്ടുകൾ സൂചിപ്പിക്കുന്നത്. എന്നാൽ അതിനെ എല്ലാം തള്ളിയിരിക്കുകയാണ് കെസിഎ അധികൃതർ.
സഞ്ജുവിന് പകരം റിഷഭ് പന്തിനെ ടീമിൽ ഉൾപ്പെടുത്തിയതിന് വൻ ആരാധക രോക്ഷമാണ് ഉയർന്നു വരുന്നത്. ഏകദിനത്തിൽ അധികം മത്സരങ്ങൾ കളിച്ചിട്ടില്ലെങ്കിലും സഞ്ജുവിന് റിഷഭ് പന്തിനേക്കാൾ മികച്ച സ്റ്റാസ്റ്റിസ്റ്റിക്സ് ഉണ്ട്. എന്നാൽ പന്തിനെ തിരഞ്ഞെടുത്തതിന് ഒരു കാരണമുണ്ട് എന്ന് തുറന്ന് പറഞ്ഞിരിക്കുകയാണ് മുൻ ഇന്ത്യൻ താരമായ ദിനേശ് കാർത്തിക്.
ദിനേശ് കാർത്തിക് പറയുന്നത് ഇങ്ങനെ:
” ടീമിലേക്ക് സഞ്ജുവും റിഷഭ് പന്തും തമ്മില്‍ നേരിട്ടുള്ള മത്സരമായിരുന്നു ഉണ്ടായിരുന്നത്. സഞ്ജുവിനെയും റിഷഭ് പന്തിനെയും വിക്കറ്റ് കീപ്പര്‍മാരായി മാത്രമല്ല, സ്പെഷ്യലിസ്റ്റ് ബാറ്റര്‍മാരായി മാത്രമായി വേണമെങ്കിലും ടീമിലുള്‍പ്പെടുത്താവുന്നവരാണ്. എനിക്ക് തോന്നുന്നത്, സഞ്ജുവിന് പകരം റിഷഭ് പന്തിനെ ചാമ്പ്യൻസ് ട്രോഫി ടീമിലെ രണ്ടാം വിക്കറ്റ് കീപ്പറായി എടുക്കാന്‍ ഒറ്റ കാരണമെയുള്ളു. അത് റിഷഭ് പന്ത് ഇടം കൈയനാണെന്നത് മാത്രമാണ് ” ദിനേശ് കാർത്തിക് പറഞ്ഞു.
ചാമ്പ്യൻസ് ട്രോഫിക്കുള്ള ഇന്ത്യൻ ടീം: രോഹിത് ശർമ്മ (ക്യാപ്റ്റൻ), ശുഭ്മാൻ ഗിൽ, വിരാട് കോലി, ശ്രേയസ് അയ്യർ, കെ എൽ രാഹുൽ, ഹാർദിക് പാണ്ഡ്യ, അക്സർ പട്ടേൽ, വാഷിംഗ്ടൺ സുന്ദർ, കുൽദീപ് യാദവ്, ജസ്പ്രീത് ബുമ്ര, മുഹമ്മദ് ഷമി, അർഷ്ദീപ് സിംഗ്, യശസ്വി ജയ്സ്വാൾ, റിഷഭ് പന്ത്, രവീന്ദ്ര ജഡേജ.