ചാമ്പ്യന്‍സ് ട്രോഫി കിരീടനേട്ടത്തോടെ കുറഞ്ഞ കാലയളവിനുളളില്‍ ഇന്ത്യക്ക് രണ്ട് ഐസിസി കിരീടങ്ങള്‍ സമ്മാനിച്ച നായകനാണ് രോഹിത് ശര്‍മ്മ. നായകനെന്ന നിലയില്‍ തന്നെ എഴുതിതളളിയവര്‍ക്കെല്ലാം വായടപ്പിക്കുന്ന മറുപടിയാണ് കിരീടനേട്ടങ്ങളിലൂടെ ഹിറ്റ്മാന്‍ നല്‍കിയത്. ഐപിഎലില്‍ ക്യാപ്റ്റനായുളള അനുഭവപരിചയം അന്താരാഷ്ട്ര തലത്തില്‍ ഗുണം ചെയ്യില്ലെന്ന് പറഞ്ഞവര്‍ക്കും താന്‍ ആരാണെന്ന് കാണിച്ചുകൊടുത്തിരുന്നു രോഹിത്. ടി20 ലോകകപ്പ് നേട്ടത്തിന് പിന്നാലെ അന്താരാഷ്ട്ര ടി20യില്‍ നിന്നും വിരമിച്ചിരുന്നു താരം. ഇതിന് പിന്നാലെയാണ് ചാമ്പ്യന്‍സ് ട്രോഫി നേടുകയാണെങ്കില്‍ രോഹിത് എല്ലാ ഫോര്‍മാറ്റില്‍ നിന്നും വിരമിക്കുമെന്ന അഭ്യൂഹങ്ങളുണ്ടായത്.
എന്നാല്‍ കിരീടനേട്ടത്തിന് പിന്നാലെ വിരമിക്കല്‍ സംബന്ധിച്ചുളള പ്രസ്താവന താരം നടത്തിയിരുന്നില്ല. നിലവില്‍ ഐപിഎലില്‍ മുംബൈ ഇന്ത്യന്‍സിനായി കളിക്കുന്ന താരം ഇനി അന്താരാഷ്ട്ര മത്സരങ്ങള്‍ക്കുണ്ടാവുമോ എന്ന് എല്ലാവരും കാത്തിരിക്കുകയാണ്. അതേസമയം ഇതുസംബന്ധിച്ച് ഒടുവില്‍ പ്രതികരിച്ചിരിക്കുകയാണ് ഹിറ്റ്മാന്‍. ഇംഗ്ലണ്ടിനെതിരായ അഞ്ച് മത്സരങ്ങള്‍ അടുങ്ങുന്ന ടെസ്റ്റ് പരമ്പരയില്‍ ക്യാപ്റ്റനായി തുടരുമെന്ന സൂചനകളാണ് രോഹിത് നല്‍കുന്നത്. കൂടാതെ പരമ്പരയില്‍ ജസ്പ്രീത് ബുംറയും മുഹമ്മദ് ഷമിയും തിരിച്ചെത്തുമെന്നും രോഹിത് പറയുന്നു. ഐപിഎലിന് ശേഷം ഇരുവര്‍ക്കും 100 ശതമാനം ഫിറ്റ്‌നസ് ലഭിക്കുമെന്നാണ് രോഹിത് പറഞ്ഞത്.
“ടെസ്റ്റ് പരമ്പരയില്‍ ഇന്ത്യക്ക് വിജയം ലഭിക്കണമെങ്കില്‍ ബുംറയുടെയും ഷമിയുടെയും ഫോം നിര്‍ണായകമാകും. തീര്‍ച്ചയായും, കഴിഞ്ഞ തവണ ഇംഗ്ലണ്ടുമായി കളിച്ചപ്പോള്‍ 2-2 എന്ന നിലയിലായിരുന്നു സീരീസ് അവസാനിച്ചത്. ഇത്തവണ ബുംറയും ഷമിയും തങ്ങളുടെ 100 ശതമാനം കാഴ്ചവയ്ക്കണമെന്നത് ഞങ്ങളുടെ ആവശ്യമാണ്. ടീമിലെ മുഴുവന്‍ പേരും ഫിറ്റാണെങ്കില്‍ ഇത്തവണ വളരെ ആവേശം നിറഞ്ഞൊരു പരമ്പരയായിരിക്കും. ഐപിഎലില്‍ മികച്ച പ്രകടനം കാഴ്ചവച്ച് അവര്‍ പുറത്തുവരുന്നുണ്ടെന്ന് ഞങ്ങള്‍ക്ക് ഉറപ്പാക്കേണ്ടതുണ്ട്. ഇതാണ് എറ്റവും വെല്ലുവിളി നിറഞ്ഞത്.
Read more
ഐപിഎലില്‍ ബോളര്‍മാര്‍ക്ക് നാല് ഓവര്‍ മാത്രമേ ഉളളൂവെന്ന് എനിക്കറിയാം. പക്ഷെ നിങ്ങള്‍ ഇന്ന് കളിക്കുന്നു, നാളെ യാത്ര ചെയ്യുന്നു, പിന്നെ വീണ്ടും കളിക്കുന്നു അതാണ് വെല്ലുവിളി നിറഞ്ഞത്. രാജ്യമെമ്പാടും സഞ്ചരിക്കുക. ഇത് വെല്ലുവിളി നിറഞ്ഞതാണ്. ബുംറയ്ക്കും ഷമിയ്ക്കും പുറമെ മറ്റ് കളിക്കാരും ഐപിഎലില്‍ മികച്ച പ്രകടനം നടത്തി ടെസ്റ്റ് പരമ്പരയ്ക്കായി ഒരുങ്ങുമെന്ന് ഞാന്‍ പ്രതീക്ഷിക്കുന്നു, രോഹിത് ശര്‍മ പറഞ്ഞുനിര്‍ത്തി. ജൂണ്‍ 20നാണ് ഇംഗ്ലണ്ടിനെതിരെയുളള അഞ്ച് മത്സരങ്ങള്‍ അടങ്ങിയ ടെസ്റ്റ് പരമ്പരയ്ക്ക് തുടക്കമാവുക.
