രാജസ്ഥാന്‍ റോയല്‍സിന്റെ വിന്‍ഡീസ് താരം ഷിമ്രോണ്‍ ഹെറ്റ്മയര്‍ ഐപിഎല്ലിലേക്ക് തിരിച്ചെത്തി. ആദ്യ കുഞ്ഞിന്റെ ജനനവുമായി ബന്ധപ്പെട്ടാണ് ഹെറ്റ്മയര്‍ ടൂര്‍ണമെന്റിന്റെ പാതിവഴിയില്‍ ടീം വിട്ട് നാടായ ഗയാനയിലേക്ക് മടങ്ങിയത്. ഇപ്പോഴിത താരം ബാക്കി മത്സരങ്ങള്‍ കളിക്കാന്‍ തിരിച്ചെത്തിയതായി രാജസ്ഥാന്‍ റോയല്‍സ് ട്വിറ്ററിലൂടെ അറിയിച്ചു.
ലഖ്നൗവിനെതിരായ മത്സരത്തിന് മുമ്പ് ഇന്ത്യയിലെത്തിയെങ്കിലും മൂന്ന് ദിവസം ക്വാറന്റീനില്‍ കഴിയേണ്ടതിനാല്‍ ആ മത്സരം കളിക്കാന്‍ വിന്‍ഡീസ് താരത്തിന് കഴിഞ്ഞിരുന്നില്ല. അടുത്ത മത്സരത്തില്‍ താരം ടീമിലുണ്ടാകും.
ഹെറ്റ്മയര്‍ തിരിച്ചെത്തിയതോടെ രാജസ്ഥാന്‍ കൂടുതല്‍ ശക്തമാകും. ചെന്നൈ സൂപ്പര്‍ കിംഗ്സിനെതിരെയാണ് ഗ്രൂപ്പ് ഘട്ടത്തിലെ രാജസ്ഥാന്റെ അടുത്തതും അവസാനത്തേതുമായ മത്സരം. 13 മത്സരങ്ങളില്‍ നിന്ന് 16 പോയിന്‍റോടെ രാജസ്ഥാന്‍ ടൂര്‍ണമെന്‍റില്‍ രണ്ടാം സ്ഥാനത്തുണ്ട്.
ഐപിഎല്ലില്‍ ഫിനീഷര്‍ റോളില്‍ തകര്‍പ്പന്‍ ഫോമിലാണ് ഹെറ്റ്മേയര്‍. 11 മത്സരങ്ങളില്‍ നിന്ന് 72.75 ശരാശരിയില്‍ 291 റണ്‍സാണ് താരം അടിച്ച് കൂട്ടിയത്. 166.29 സ്ട്രൈക്ക് റേറ്റിലാണ് ഇത്. ടൂര്‍ണമെന്‍റില്‍ ഒരു അര്‍ദ്ധ സെഞ്ച്വറിയും താരം നേടിയിട്ടുണ്ട്.