സഞ്ജു സാംസണിന്റെ പ്രകടനങ്ങള്‍ക്ക് വേണ്ടത്ര വിലകല്‍പ്പിക്കാതിരുന്നയാളാണ് മുന്‍ സെലക്ടറും അഗ്രസീവ് ബാറ്ററുമായ കെ ശ്രീകാന്ത്. ബംഗ്ലാദേശിനെതിരെ സഞ്ജു സെഞ്ച്വറി നേടിയപ്പോള്‍ ബോളിംഗ് നിര ദുര്‍ബലമായിരുന്നു എന്നായിരുന്നു ശ്രീകാന്തിന്റെ വിലയിരുത്തല്‍. എന്നാല്‍ ദക്ഷിഫ്രിക്കയ്ക്കെതിരേ അവരുടെ നാട്ടില്‍ സഞ്ജു രണ്ടു ടി20 സെഞ്ച്വറികള്‍ നേടിയതോടെ തന്റെ അഭിപ്രായം മാറ്റിയിരിക്കുകയാണ് ശ്രീകാന്ത്.
സഞ്ജു ചേട്ടാ, എന്തൊരു അടിയാണ് നിങ്ങള്‍ അടിച്ചത്? ബോളര്‍മാര്‍മാരെ അക്ഷരാര്‍ഥത്തില്‍ തല്ലിച്ചതയ്ക്കുകയായിരുന്നു. 200നടുത്ത് സ്ട്രൈക്ക് റേറ്റിലാണ് സഞ്ജു ബാറ്റ് ചെയ്തതെന്ന് ആവേശത്തോടെ ശ്രീകാന്ത് പറഞ്ഞു.
രണ്ടു കളിയില്‍ സെഞ്ച്വറിയും മറ്റു രണ്ടെണ്ണത്തില്‍ ഡെക്കുമായതു കൊണ്ടു കുഴപ്പമൊന്നുമില്ല. അതില്‍ തെറ്റൊന്നുമില്ല. നല്ല അഗ്രസീവായാണ് സഞ്ജു ബാറ്റ് വീശിയതെന്നും ശ്രീകാന്ത് ചൂണ്ടിക്കാട്ടി.
ദക്ഷിഫ്രിക്കയ്ക്കെതിരേ നാലിന്നിങ്സുകളില്‍ നിന്നും 216 റണ്‍സായിരുന്നു സഞ്ജുവിന്റെ സമ്പാദ്യം. 194.59 എന്ന ഗംഭീര സ്ട്രൈക്ക് റേറ്റോടെയാണിത്. രണ്ടു സെഞ്ച്വറികള്‍ തന്റെ പേരില്‍ കുറിക്കാന്‍ അദ്ദേഹത്തിനു സാധിക്കുകയും ചെയ്തു.
